利嘉敏：高官們應該學習的5招傍身術

要數高官們至愛歌曲，必是《沉默是金》。至於他們受了那裏的教訓和得了甚麼書經的指引，則不得而知。近排 TSA 鬧到滿城風雨，老師家長怨聲載道，教育局長吳克儉仍堅持「笑罵由人灑脫地做人」。

上周立法會教育事務委員會舉行 TSA 公聽會，吳克儉竟因「私人理由」休假離港拒出席。又， 十一月十七日港中足球大戰，特首及三司十二局被問支持哪隊，竟無人敢表態，集體表現「任你怎說安守我本份，始終相信沉默是金」。

話晒高官們都大大話話成二三十萬一個月， 下下只唱住此曲走江湖，好寡同「行」啫！其實都不求高官們貢獻同月薪成正比，作為小市民，但求官員回應時有啲 variety（多元化），令大家生活在這城市裏不至於那麼悶騷而已。

建議高官們可參考黃子華教落的五招：一、「係～咁～㗎～啦！」二、「好～出～奇～呀？！」三、「搵食啫！」四、「犯法呀？！」及五、「我想㗎？！」

示範一。甲：「吳局長，TSA 話題宜家水深火熱，你都唔出嚟嘅？」吳：「係～咁～㗎～啦！」甲：「你身為教育局長，TSA 公聽會，竟以『私人理由』休假離港唔出席？！」吳：「犯法呀？！」

示範二。乙：「局長，問下你港中足球大戰支持邊一隊啫，使唔使避到咁閃縮呀？」局長：「好～出～奇～呀？！」乙：「身為港人都唔敢撑港人？」局長：「係～咁～㗎～啦！」

示範三。丙：「丁署長，啲郵筒徽號好哋哋，唔好搞佢哋啦！」丁：「我想㗎？！」丙：「咁有無人因個徽號寄錯信、有無郵差因徽號而唔知嗰個係郵筒吖？咁遮徽號到底係香港郵政決定，抑或有更高層官員指示？」丁：「大佬 …… 搵食啫！」

正所謂「五招傍身、世界通行」。高官同市民愈來愈天各一方，你有你嘅生活，我有我嘅忙碌。假如有一日，高官真係喺路上面同大眾偶然咁撞倒，大家未必會點下頭，甚至可能會俾人「問候」一下，但起碼，唔會再唔知講乜好。

全文刊於《經濟日報》（收費閲讀），標題經TOPick 編輯修改，原題為「高官必讀五招」