莊偉忠：普通常識

放假十一日，返工第一日，短訊部門主管，其實無乜特別想講，淨係提醒佢輕鬆面對困難，萬大事由我負責，淡淡定有錢剩，係常識。

除咗大大大大大鑊，同事放緊假、放咗工，唔准whatsapp、唔准wechat，唔准line，唔准call，唔准email，唔使人教都識，任何職責都有個限度，無人應該全天候服侍無理苛索嘅上頭，呢個都係常識。

記得離開瑞士嗰日，咁樣寫：「旅行嘅嘢，過眼雲煙，無論幾震撼，記得一日，記得兩日，記唔到三日。」

估唔到，返到香港，同一番說話改為：「瀨嘢嘅嘢，過眼雲煙，無論幾大鑊，記得一日，記得兩日，記唔到三日。」真係正到暈嘅常識。

做人做事，有高有低，有順有逆，好平常，勝不驕，敗不餒，順風順水嗰陣，唔好懶醒，頭頭碰着黑，都唔好妄自菲薄，更加唔好賴三賴四賴人哋，有功同事攞，有鑊自己揹，如果唔係，有鬼人肯同你搏，呢個更加係一定要識嘅常識。

問題係，上頭有無常識？有無胸襟？有無膽量？有無自信？一般嚟講，樣樣都無，係人都知嘅常識。如果係咁，為自己前途打算，盡早另謀高就，都係越早明白越好嘅常識。

原文刊於莊偉忠Facebook ,獲授權轉載。