劉青雲:驕傲可以係一種自信

休閒 11:00 2015/11/26

分享:

情困、後悔、壓榨,一切都像代表負面,但凡事無絕對,心態是影響你情緒的真兇。

在懸疑推理片《消失的兇手》大鬥戲的劉青雲與林家棟,皆公認演技出眾,同樣從電視工廠日以繼夜地捱出來,what doesn't kill you makes you stronger。

心態,決定命運。

繼《神探》、《竊聽風雲 3》後,《消失的兇手》是青雲與家棟第三度在大銀幕交手,前者飾演警政官松東路,調查後者所演的新加入角色大學教授霍華,本來風馬牛不相及的兩人,因無良工廠接二連三發生工人跳樓自殺案而連結起來。

記者:一般來說,覺得演繹全新角色與重複演同一角色,哪樣難度較高?

劉青雲:冇大分別,最重要係導演想點、佢點解要拍,演員係負責理解而已。

林家棟:演新角色係好玩啲,但重複則會難啲,演出要比上一次豐富,須在固有框架再挖深才行。今次與青雲的演出交流較多,《竊聽風雲 3》是群戲、《神探》大家都較沉默,所以很過癮。

我的角色用很冠冕堂皇的說話去包裝,實際是為自己利益,很貼近現實,社會上很多這類人。

相片來源:經濟日報

劉青雲:松東路由開始已唔特別鍾意霍華,因為他以為傅源(江一燕飾,上集與松東路感情似有還無的女囚犯)逃獄的原因一定唔簡單,或者係為了見自己,但她竟然去聽霍華講課,佢有咩咁吸引?所以那場戲,我係黑口黑面。

松東路的性格係懷疑所有人,包括懷疑傅源,所以他早就唔信教授,但他本來一早可以查出件案,問題是他鍾意傅源,但又唔肯畀人知,所以心情一直矛盾,一日到黑扮 cool,影響查案情緒。

記者:為女人而影響判斷是普遍男人的弱點。

劉青雲:唔係所有男人,有啲男人覺得係優點。

林家棟:我冇呢個難題噃。

劉青雲:我 OK 啦,拍戲嚟講係屬於生人勿近。

記者: 片中所講,對人最大的懲罰是後悔,你們人生有沒有做過很後悔的事?

林家棟:冇得後悔,決定了去做就必須承擔。做人唔好賴,成年人做一件事,大約都知後果,唔好怨喇。永遠向前行,結果好唔好都要承受,後悔不如一開始就唔好做。

劉青雲:

人人都會後悔,最重要係跟住點。有人後悔之後會改進,因此進步了;有人從此一蹶不振,咁就梗係唔好。

 

即等如驕傲係唔係一件壞事?唔一定,驕傲可以係一種自信、係向前的力量。

 

貪心都不一定是壞事,你想要多啲?勤力啲囉,但去打劫就梗唔得啦,最重要係你點做。

記者:這電影講財閥壓榨工廠工人,TVB 亦被很多人稱為工廠式生產,演員拍劇連續開工十幾小時也屬平常。以你們當年在電視台的經歷,有否覺得被壓榨?

相片來源:經濟日報

林家棟:冇。當然我聽很多朋友講現在電視台將佢哋榨到好乾,但是當你由零到薄有名氣,多了機會繼續向前行的過程,是學緊嘢。

初入行時有很多嘢唔識,有很多人教緊你,而過程中電視台有畀人工,當你名成利就,會唔會分番畀電視台?唔會。

所以應該用學習心態去睇呢個階段,而且抱被壓榨的心態,做得唔開心又點會做得好?應用樂觀心態,你做得好,怕佢會唔搵你?

不論電視、電影以至每一行,只要你做得好,管理層就會畀機會,因為你係佢資產,對公司有利益。

當年拍《大時代》聯交所的戲,因是最後一場廠戲,拍完趕住畀丁蟹父子出灣仔拍跳樓,一定要一次過拍晒,連去廁所都要申請。

連續拍 30 幾個鐘,但見旁邊是秋官,曾勵珍、韋家輝又送早餐嚟,幾興奮呀。現在回想,當時睇住導演點拍嘢,過程真係學緊嘢,所以唔好咁消極。

劉青雲:經常朝早 6 點拍到凌晨 2 點,都冇時間諗有冇壓榨。你講拍《大時代》唔畀去廁所,我身在其中直情唔知,係拍咗 30 個鐘都唔覺。

做人最緊要係你想點樣?如果覺得被壓榨,咁你點做?老實講,我冇諗,但就咁捱咗咁多年。

好多嘢就係咁學番嚟,最高紀錄拍 32 場廠戲,拍完一個廠立即去另一個,仲要自己 mark 衫,因此我哋適應咗要快。

初拍電影時真係像鄉下仔,拍一場戲,心諗:「咁慢嘅?」幾句對白,分 4 次 take;拍電視時兩、三頁紙對白,排兩次就拍㗎喇,拍電影得 3 句嘢,掉轉講都識啦!仲要慢慢拍?因此初拍電影時覺得很順利,當然,電影嘅要求又係第二樣嘢。

電車難題

片中借霍華的口,講著名政治哲學題「電車難題」(Trolley Problem)來討論道德,內容大致是:

假設看到一列失控的電車,高速向 5 個鐵路工人衝去,正好你面前有可令電車轉軌的控桿,但若轉軌往另一條便會有另一個工人被撞死。

那麼如何抉擇?

影片再提出另一問題:

假設看到一列火車失控將撞向 5 個人,在月台的你,將身邊一個肥仔推落路軌影響火車運行,就可救那 5 人,你會否推人落軌?

青雲與家棟又會點揀?

林家棟:如果第一個情況,會揀轉彎;第二個情況,唔敢推人落軌,我唔夠膽做呢個兇手。

劉青雲:我就自己跳落去,因冇權犧牲一個人的性命去救其他人。

消防員都一樣,他們原則上唔係要用自己條命去換你條命,當然現實很多消防員係冒自己生命危險去救人,但唔應該咁樣。

林家棟:其實係兩難,這問題的選擇是在於觀點角度,冇一定的對或錯。

劉青雲:主要是透過此問題,去了解你的思想,你究竟係點樣嘅人。

節錄自刊於《經濟日報》(收費閱讀)

標題經TOPick 編輯修改,原題為〈劉青雲 林家棟專訪 心態決定命運〉