移民？英國？咪玩啦！

一家人的決擇，何來對與錯，那有標準答案

承蒙 Topick 不怕失禮去訪問，我呢個既「不孝」又「偽有錢」嘅低質英國華僑其實相當榮幸。响我細讀當中嘅留言，發現某啲朋友對移民、選擇英國甚至本人有些少誤解。容許本人以拙劣嘅邏輯，用單向嘅思維澄清下一家人移民英國呢個愚蠢嘅決定。
對於任何人，移民從來都係一家至親嘅主觀決定同共識，只係為咗小朋友並唔係足夠嘅。如果家長心不甘情不願，將來咪換黎嗰句「唔係為咗你地，我當年就唔洗乜乜物物」又何必呢？老人家嘅感受同處理，當然非常重要。不過每家嘅關系同結構都唔同，要無父無母或者不孝先可以移民會唔會勁咗啲呢？日日電話嗰啲唔算啦，依家我每年與父母同屋相處旅行嘅時間重多過任何時間。「孝義」係用口講還是真心做，我唔太理解。

英國從來都唔係童話世界，移民亦唔係仙丹靈藥（講過過百次！）。問題係經過考慮同視察後決定咗就享受優點，接受缺點咁解。無黑衣人捉我一家上洗頭艇，迫我黎架喎（亦唔會迫其他人黎）。講到「二等公民」咁古典嘅形容詞，其實真係好汗顏。我只係知英國得一種公民，中國嘅香港分幾多種我唔多懂。

至於歧視同所謂階級，英國人有時的確係好有階級觀念同保守。我幾肯定歧視言行同所為，比膚色、口音同族裔嚴重（自我觀感就無謂講）。不過由「嗰一年」開始十幾廿年來，我感受到作為香港人响香港被歧視感覺比响世界任何國家都深！乜香港原來無階級觀念嘅咩，試下無樓無錢唔係專業成功人士，睇下啲同文同種嘅人會唔會講歧視同階級？

最後想講嘅，我不過係一個曾經（自以為）搵多些少，供樓供到懵又「貪威識食」嘅偽中產。只係好好彩上一代留咗個英國公民身份比我，响家人支持下任性地跳出唔多comfort嘅comfort zone去英國生活。本人大概係一個有小小咁多移民知識，口貧筆賤中文爛嘅網絡塵埃，唔係亦唔會係什麼K乜嘢OL。自問何得何能令每個人每日睇完，身心舒暢如沐春風呢？