「是是但但」工作態度是怎樣煉成的？

仲係職場初哥既時候，會想像第時係工作上點樣可以好圓滿咁完成一個task，有上司lead住你，循序漸進教你學識每項工作細節，做錯左會聽到一句「唔緊要」然後提供埋standard answer參考。

好快你會發現真相，開始見到周邊既同事日日俾雜亂無章既工作搞到頭都大埋，聽到管理層經常埋怨「啲野笠笠亂就推晒俾我地去跟，搞唔掂責任係我地度。」

即使作為小薯仔都無得避走，一接手就見到file永遠唔會整齊排列好，email同request一個接一個未得閒分類好又要趕住回覆。

要求同事死線前務必要交好假紙、attendance record、MPF表格，總有幾個收唔齊，原則上可以狠心起黎唔幫佢處理，但係為左大家日後好辦事，上司通常寬限多少少時間，叫你自己跟緊啲，要不停客氣咁「請」佢盡快遞交。

其實除非有特別原因，否則人人以為人事部「無你符」，不過上司點講唯有照做。

小事上，「將就下」自己同事不為過，之但係一去到可能影響部門聲譽既時候，經理們會自動挺身而出，又好容易同我地出左名係搖頭草既老闆有爭執……

Email都無個，打個電話黎叫我地做就做，佢話以前係咁做開，唔係下嘛。

大聲公既Betty經理講完個電話就扯火，老闆斟完水踱步番黎時，Betty就開始投訴，

老闆，IT個邊每次有空缺，個阿head就只係打電話黎講話要人，唔交request form，想點出報紙又唔講，唔通連job duties都要我地諗埋？

 

我地要計字數quote價，咩資料都唔提供我地做唔到野。

老闆停低皺一皺眉，

IT個阿head……哦……就黎退休果個嘛，既然佢咁講，你就睇番係咪上次都係咁做法，係就照跟舊template，我估佢地應該無咩改動，搞掂俾個sample佢過下目，肯agree就出街，好小事姐。

附近豎起隻耳聽緊既同事當堂出現「唔係卦」既表情，就算以前有同事咁闊佬懶理，唔代表無問題，況且點諗都唔應該盲摸摸去做份草稿俾人睇下岩唔岩心意，大粒佬係需要咁樣無低線咁服侍架咩？

老闆是是但但，樣樣追求大事化小，小事化無既心態，只會害慘下面班同事。

有理據想力爭，一直得唔到正面既回應，咁不如一齊是是但但，係完全無壓力既狀態下工作？慳水慳力，逗份人工咪算囉？

文章刊於作者HR熊 - 職場航行日誌 Facebook及個人網頁，TOPick 獲授權轉載，標題經編輯修改，原題為「不如一齊 是是但但」。