每間公司都有一個神射手

攻呀攻，快搶攻！射呀射，射它吧！

其實每次聽到這首歌我都會感到很無奈，因為我會立刻想起公司的神射手。神射手，顧名思義，就是最叻射波，百發百中。

射波在工作上大概可以指同事詐病突然請假，把波（工作）射（交給）給其他同事的意思，但神射手其實又點止咁簡單？神射手除了會突然請假，即是沒有預先交低身後事，令其他同事要幫忙執手尾外，平日亦會想盡辦法將所有麻煩事或蘇州屎射給同事，特別是新同事。

「好難寫呀份PR，Brenda你上次寫過，今次都係你寫返啦。」「嗯。」

「我唔識Google㗎，我電腦白痴嚟，Brenda你嚟啦。」「嗯。」

「Facebook？我開咗都唔係好識玩，你搞啦年輕人最叻呢啲。」「嗯。」

「唔知點解我轉唔到繁簡體，你照住老闆啲comment改完再幫我轉簡體吖。」「嗯。」

新入職的通常都是yes man，咩都say yes，起初可能可以給人一個好印象，但長此落去，其實只會整死自己。

正常來說每個同事都會被分配不同的工作，可是總有人會把工作射給其他「好同事」，自己則可以少做少錯。其實在辦公室內，幫你係人情，唔幫你係道理，無人話過你求人人地就一定幫，有啲仲要擺出老鳳咁嘅姿態，真係好黑人憎！

可悲嘅係只要你一開始建立了一個「好人」形象，當你有一次做了衰人（其實可能只是婉拒幫忙做非自己份內的事），就會立刻被打落十八層地獄，反而如果你平日做開衰人，久不久出一次手幫個小忙，同事反而會當你神咁拜，人就係咁，成日take it for granted，從來唔會欣賞好人做好事，所以我不嬲都話做衰人係好過做好人。

「上次寫過份PR唔代表以後就要係我寫㗎喎，今次老闆明明係叫你寫！」

「唔識咪學囉，無人一出世就識用google㗎，何況google真係易到我都唔識點教你囉！」

「年輕人最叻玩Facebook，咁6、70後最叻係咪玩射波？」

「我幫你轉繁簡體容乜易，問題係老闆叫你改comment，唔係叫我，唔該你改好晒啲comment先比個file我轉！」

現實中又有幾多個新仔夠膽反抗？所以以上嘅對話，都係幻想吓好喇。神射手除了懶，通常還很怕死，所以你問他任何問題，他都只會答你：

唔知呀，我咩都唔知㗎。

因為怕講多錯多，怕要負責任，有時更會給你一些九唔搭八的答案，令你一頭霧水或耍到你氹氹轉，為的都是希望你不要或不敢再叫他幫忙。

他亦會扮無知，乜都話唔識做，或做得很慢又多甩漏，然後老闆也不敢對他委以重任，於是他又可以輕輕鬆鬆準時收工。相反，你做得嘢，老闆咪將佢果份比埋你做囉，唔公平？係咁㗎啦，好出奇呀？

神射手仲有一個絕技，就係扮忙，每次老闆搵佢佢都好忙，忙到個頭出晒煙咁滯，然後老闆一走佢就繼續whatsapp同facebook，真係吹佢唔脹。

可能你會好奇點解一個咁無生產力嘅員工仍然生存到，好簡單啫，皆因每個員工都有其不同用處，其中一樣講得好聽就係交際手腕好，其實意思即是懂得扮小丑氹老闆開心、陪笑陪吹水及擦鞋等，你問心做唔做到佢咁唔要面先？做唔到吖嘛，你覺得做人要有骨氣吖嘛，咁咪唯有繼續默默耕耘，做埋人地果份囉。

有人當神射手，當然有人要負責守龍門，此人責任重大，可是通常都是由公司的small potato擔任，即是新嚟新豬肉。

一間公司有多少個神射手，唔定㗎，睇你好無彩啦，好彩的話，公司可能只有一個神射手，勉強還可以撲救成功，不過唔好彩的話可能個個都係神射手，再加埋球證、足總都係佢嘅人，真係祝你好運。

波就係人都想射，射入咗就會受到眾人歡呼，但守龍門的人守得住卻是應份的，稍一不慎的話，便會即時比人插到上天花板，可能你會呼冤：

唔公平！我得一個人一對手，點接得晒咁多波？

無㗎鬼叫你職位低年資少，你有本事咪爬上去，到時射返夠本囉！

龍門，你今日守咗未？

原文刊於作者小盛女facebook，文章獲作者授權轉載。