莊偉忠：借花敬佛

唔記得邊年開始，專登儲埋啲禮物，留嚟畀同事聖誕大抽獎。

可能今年生意跌咗，大家心情差咗，手頭緊咗，收到嘅禮物好似少咗，但少有少抽，無乜所謂，有得玩就得。點知對上幾日，收禮籃、禮物，收到手軟，多到用唔哂，遲啲求其作個理由再抽過，我代所有同事，多謝商界朋友記得我哋。

▲ 相片來源：莊偉忠facebook

有心唔怕遲，物輕情意重，送禮嘅人要明白，收禮嘅人更加要明白，禮物唔係送畀你㗎，係送畀坐喺權力位上邊嘅人㗎咋，用嚟做個順水人情，借花敬佛，豆零唔使花，同事就可以嘻嘻哈哈，唔做就傻。

識做生意嘅，識管理嘅，識激勵士氣嘅，就會明白，嗱埋塊面，瘋狂捽數，逼到手下痴線，差啲連自己都痴埋線，根本改變唔到市道差嘅現實，可惜大部份腦細永遠唔會明白，人蠢真係無得救㗎。

想長期保持戰鬥力、創作力、復元力，一定要貪玩遊戲人間，識得分甘同味維繫團隊精神，咁至可以喺唔驚輸、無後顧之憂嘅情況下，輕鬆面對艱難，咁樣或者可以行快隔離對手半步，半步之差，就夠逆境求生啦。

唔理順境逆境，有得做就盡力做，有得玩就盡量玩，有得笑就盡情笑，有靚花就盡心敬佛，人生多數快樂。仲有兩日，預祝大家聖誕、新年、時時刻刻，快快樂樂。

原文刊於莊偉忠facebook，文章獲授權轉載。