張晨：成班男人一定係打邊爐

天寒地凍，最好係咩？一定係打邊爐。

但對成班男人嚟講，全年365日，唔理凍定熱，只要可以聚埋一齊，永遠都係打邊爐。

若然約夜晚飲酒，阿強或者都會問一句：「有冇女？冇女我放飛機。」

但一講到打邊爐，阿強只會講斬釘截鐵講句：「唔好有女！有女我放飛機。」

點解？點解一班仔打邊爐會咁爽？

好！我問你呀，食晒碟肥牛要幾耐？話你知，如果你放啲肥牛落個窩度，而5秒之後啲牛仲響度的話，

你根本就唔係打緊邊爐，只係嘥緊Gas。

咁何解你哋有5秒時間都吃唔晒啲牛？因為啲女仔可能會問：「未熟咁點算喎！」

可怒也！平時去Steakhouse，你咪又係嗌5成熟！仲會嫌人哋熟得濟，彈三彈四！製造一種錯覺令人哋以為你真係皇帝脷，5成熟定6成熟都畀你食得出。

咁打邊爐做咩要咁堅持？你而家歧視塊雪花牛肉呀？去到日本，你刺身都係咁食啦！根本完全唔係理由。

同時之間，成班男人，亦唔需要禮讓。

有時同啲「點頭之交」打邊爐，真係好辛苦！因為有女在場，大家都開晒「禮讓Mode」扮有風度，計住計住，左一句「我食咗四塊啦，呢兩塊你食啦」；右一句「牛丸每人一粒，呢粒係你嘅」。

我食到差啲要開Excel整條公式睇下7個人點平分10塊肥牛！心諗：「關愛座呀？打個邊爐都讓嚟讓去？」

但若然係成班仔，打邊爐就係一個戰場。

佢唔會理「熟未」，一撈吃晒十塊。即使你一塊都冇，佢都唔會Say Sorry，只會恥笑你太低智。真心FD讓甚麼？

如果你成餐飯都聽唔到一句「你食咗未。」恭喜你，呢班真係死黨。

仲有地球人最鍾意係咩？就係圍爐取暖囉！

成枱單性生物，你想噏咩都得。媾唔到女嘅可以怨，鬧爆佢哋；有女嗰啲照怨，跟隊一切鬧佢哋。

一啲你連打上FB都唔敢嘅內容，只有同一班仔打邊爐先夠膽開聲。幾傻幾天真嘅話題都可以照噴出嚟，唔需要懶衛生用公筷，男人老狗一支筷子從一而終！

冇囡囡在場，囝囝先可以顯示最邪惡嘅一面！

所以，我覺得啲酒樓可以效法酒吧嘅Ladies night，整返個「男士欲食之夜」，只要純男人一枱，啤酒肥牛半價。我包你客似雲來，改埋個名叫「邊邊有力」，準備定上市都得。你唯一需要擔心只係會接到「噪音投訴」。

有人話成班男人打邊爐，粗口爛舌，內容毫無養份。講得啱呀，我哋就係要冇養份。

咁我哋求咩？就係畀自己弱智一晚。

因為人愈大，就愈明白肯同自己一齊弱智嗰位，先係最難得嘅老死。
 

原文刊於張晨（鳥不起）facebook，獲作者授權轉載。