置業人生勝利組一殼眼淚

有無睇向西村上春樹嘅新作？真係好搞笑！

有睇，當然有睇。

日前向西兄以一貫生動筆觸，預測舊年摸頂買新盤業主嘅十年運程：

幾經辛苦上車做業主，以呎價萬七蚊買下200呎蚊型盤，樓價翌年轉趨向下，除咗帳面承受樓價跌幅，心理亦飽受朋友恥笑、女友嫌屋細嘅煎熬……

Denise睇完都有笑，不過係笑中有淚。明明早幾年，大家仲講緊上到車係人生勝利組，能夠得到女友寵幸、外母垂青，仲要親自夾雞髀去你個碗度請你食。幾多人努力不懈抬錢上會，發夢都大嗌我要做業主？點解過咗幾年就世界變？

錯誤時間買樓 成大挑戰

無殼蝸牛開始慶幸自己無（能力）喺高位入市；而買咗樓嘅人，就開始由人生勝利組，變成人生怨氣組，開始心裏問責：當時係邊個話樓價高處未算高？並且怨恨嗰位曾經叫你循序漸進、先買細屋再換大屋嘅長輩，覺得係佢「導」你中伏。

Denise認識一位朋友，正正喺舊年買入樓花，鎖匙未攞到，已經疑似變成負資產。我希望佢心理質素夠好，可以捱過呢個樓市寒冬，亦祈求佢喺職場唔好行差踏錯，事關一家大細連埋層樓都靠佢。

我唔理解上一代人係點樣撑過九七、捱過沙士、跨過金融海嘯，然後柳暗花明又一村；我只係知道揸住層樓活在熊市當下，真係一大挑戰。

全文刊於《晴報》

晴報facebook