婚後住邊好？原來丁屋並非「無得輸」

認識一對情侶，開始拍拖時，女仔已經話婚後一定要住九龍灣，因為佢屋企人、朋友全部都喺呢區。男仔不以為然，覺得女方只係講下，過多幾年諗嘢成熟啲自然拆得掂，所以從來無將件事放上心；加上佢本身係元朗原居民，有權起丁屋，只係未到決定性一刻（結婚），佢唔想貿貿然使一大嚿錢起樓，況且，佢根本無。

幾年後，呢對情侶計劃拉埋天窗，「婚後住邊區」呢個話題重新擺上談判桌。女仔以為多年來自己嘅意願已經清晰表達；男仔則以為女方已經識諗，點知，原來兩個都唔夠了解對方。

男女雙方意願大不同

佢哋為呢件事大吵一場。女仔話，呢個係佢唯一要求，就算係租、係買、抑或兩公婆搬返娘家住，佢都無所謂，堅持寸步不讓。男仔則抗拒與女家同住，怕被人講閒話，結婚要靠女家養；而從金錢角度睇，出市區租樓或買樓，對佢嚟講都好無謂。

自己有丁屋點解要出去捱貴樓？佢依家有車，喺村入面可以周圍泊；出市區住，停車場費已等於佢一個月油錢，佢怕會失卻自由。男叫女學揸車，女叫男唔好再玩車，最後傾唔掂，拍枱走人。

我以為佢哋會因此分手，事隔一個禮拜，佢哋一如以往拖手亮相。我問女仔最後點解決，佢話問題根本無處理過，只係佢哋之間，再無人敢提起結婚。

你以為住邊區好小事？是小事，也是大事。

全文刊於《晴報》

晴報facebook