HR熊:HR的職業病
發布時間: 2016/02/05 15:54
▲ 相片來源:YouTube 影片截圖
想做一個感覺親切嘅HR,識睇眉頭眼額係唔夠,仲要留意住自己係工作上微小嘅一舉一動,將自己潛移默化塑造一個成功嘅偽善形象。
自問脾氣麻麻,仲成日俾男朋友話我一有唔鍾意塊面就黑到出晒面,佢肯包容我就話無緊要姐,不過返工對住咁多唔同嘅面孔表現真我就一定輸蝕。
識得小妹嘅通常會好奇點解一個宅女會揀做HR,唔係要處事好圓滑,talk得又玩得架咩?當初揀呢一科去讀,係單純想搵一份文職工做。
一向說話不多嘅我,做presentation做fyp都係硬著頭皮將講稿死記硬背,唯一我唔怕嘅,係雙眼直望人講嘢,將要表達嘅訊息肯定咁傳入對方腦袋入面。
諗返起做第一份工時係年少氣盛,喜怒形於色。
客仔遲交文件,同其他部門合作安排唔順利呢啲小事係咁NG會好上心,日復日係E貓send "kind reminder"等唔到回覆,就會氣沖沖打電話去追……
雖然話係為左履行份內事,但係可能忽略左人地對我嘅觀感評價係點,俾人係背後指點話小薯仔懶巴閉發住脾氣做野。
幾年過後,遇到同樣嘅case已經自然跳過心煩氣燥嘅階段,有自己一套去處理。被無視多次reminder,下次就順手cc佢上司俾啲壓力,再無反應不如親身拎住張後備form行到去佢座位「請」佢即時填番,俾附近諸多八卦嘅同事眼望望,唔會仲好意思托我手踭掛?
雖然心入面唔想咁,不過為左交到貨,都要婉轉地逼迫下同事。
而最難頂莫過於係俾直屬上司NG用黎做御用黑鑊,一有任何complain先對你嗌晒救命,指責你唔夠機警發現唔到問題,然後係眾人面前無奈表示因為佢係你上司,就貌似冤屈負起責任。
如果你忍唔住當場表現強烈不滿實會被秋後算帳,太溫馴又會中多幾次招。任由你心入面念幾多遍三字經,轉身去飲冰水又好,搣大脾握拳頭都好,只要一激動到花容失色就失去氣勢。
做得HR,係policy和實際執行上大家做法常有出入有拗撬,唔敢出聲就會被淘汰。即使自己平時幾鵪鶉都好,去到呢啲位先作最壞打算,盡可能以得罪最少人嘅程度冷靜去解釋自己嘅做法,令人意識到你係硬食左隻鑊先有用。但係當我係戰場返回坐位時,驚恐嘅心情先逐漸浮現,想像會唔會俾上司照肺然後俾信叫我走呢?
公司總有一堆唔自律嘅客仔同埋咩都要瘋狂urgent嘅老闆,係人事部做野真係好棹忌人際關係唔好,日日絞盡腦汁去應對唔同情況,不知不覺就會「上身」。
係啲中同小同(編按:中學同學、小學同學簡稱)聚會特別明顯,自己一開口斯文又官腔,明明唔想笑嘴角會不受控上揚,野食一放枱會自動企起身分比佢地,講左數之不盡咁多句「唔該」、「麻煩晒」同埋「唔好意思」……
完場之後諗返起個心都寒一寒,頭先個位邊個黎?我唔識佢!
職業病不停NG傷身又傷神,係戰鬥格背後,藏著一大堆苦悶和怨氣,搞到工作以外嘅時間變到「人唔似人,鬼唔似鬼」,小熊想係放左工就立刻抽離角色,睇黎仲要經歷一段長時間磨練先去到果個境界啦!
文章刊於作者HR熊 - 職場航行日誌 Facebook及個人網頁,TOPick 獲授權轉載。
標題經TOPick 編輯修改,原題為〈職業病NG〉
撰文 : HR熊 - 職場航行日誌