一屋五姓人

古時有錢佬愛群居，鍾意買間大屋一家N口同住，大哥二嫂三嬸四姨婆五姑姐，幾代同堂共冶一爐，不知幾咁熱鬧高興。

今時今日，人人渴望擁有私人空間，有錢都寧可買多幾層樓分開住，一屋N姓人嘅盛況，或者只能夠喺窮人屋企體現。

話說農曆新年期間，Denise去咗位疏堂表姨屋企拜年。出發前，阿媽話表姨啱啱結婚（雖則佢輩份高，但同我一樣係80後），我抱住參觀新屋嘅想法出門，殊不知目的地居然係表姨娘家。

初時心諗：佢一定怕我哋頻撲走幾家拜年，唔想我哋太辛苦啦？後來至知，原來佢婚後與老公繼續住響娘家400呎公屋。

住入娘家 七人居400呎公屋

你可能話：婚後同屋企人住好平常啫！之但係，間屋除咗表姨兩公婆，同佢父母之外，仲住咗佢細佬一家喎！佢細佬唔生性，無穩定職業唔在講，十幾歲搞大人個肚，後尾老婆走佬，依家同BB以及新任女友黐實兩老住。

Denise數數手指，一家七口五個姓。嘩，都好逼下喎。話說兩位老人家愛錫兒女，讓出兩房，自己則瞓客廳梳化床，朝行晚拆。

一諗到我坐緊張梳化原來係佢哋張床，即刻有少少唔好意思，擔心咬瓜子時啲碎屑會彈入床罅。我阿媽唔識趣，繼續口沫橫飛，係咁問人：咁多人點住呀？好難搞啫！諸如此類。雖則表姨笑住話係暫時性，但眼神卻流露出十萬個無奈。

有頭髮邊個想做癩痢？香港地，想有自己地方話咁易咩？

全文刊於《晴報》

《晴報》facebook