鄭丹瑞：祖父母再培訓湊孫是「堅離地」

你一定聽過：「自己的孩子是要來罵的，孩子的孩子，即我的孫子，是要來寵縱的。」

不管你同意與否，祖父母就是溺愛孫兒們。

我想食糖！

如果講這話的是自己的孩子，必然換來父母一頓臭罵：

食咁多糖，因住爛牙，到時醫生錢貴過粒糖一百倍呀！

但假如想食糖的是自己的孫，那就完全是另一回事，起碼語氣已是一百八十度的分別：

食啦，鍾意成包攞去食啦；乖，不過最好唔好一次過食咁多，會蛀牙就弊傢伙喇！

所以我哋個政府真係急市民所急，整番個祖父母再培訓計劃，等呢班親疏有別嘅老人家，可以經過再培訓，學吓點樣一視同仁咁去湊孫，真係唔話得。

損友甲大讚特區政府的德政。

湊孫仲使學？仔女就話要教啫，孫就係要嚟玩啦！

損友乙剛榮升阿爺，最有資格發言：

總之氹到佢笑晒，我同老婆就開心，個孫一扭計，就即刻交番俾佢父母湊，佢父母唔喺身邊，就交俾個工人姐姐，湊孫不能夠太認真、太投入！

認真你便輸了。

要教就留番俾佢父母教，千祈唔好代人教仔，就算嗰個係自己個仔都係咁話！所以，我都唔知祖父母有乜好再培訓？坐喺冷氣房入面想出呢啲計仔，真係『堅離地』。

我相信此舉乃一番好意，可惜政府太過弱勢，提出甚麼都會被批評、質疑；更要命的是，包裝和推銷都冷冰冰，毫無人味，需要再培訓的，何止祖父母？﹗

原文刊於經濟日報（收費閱讀），標題經編輯修改，原題為「祖父母再培訓」。