地產經紀說話的藝術　

yo ! 上集講到睇樓之睇樓宇嘅內籠，今集我地就睇開少少。

依期樓市雖跌，但市區樓真係想都不敢想，唯有考慮返屯門元朗區啦。不過，須知道住嘅地方雖不是孤島但都差無幾 - 回家的路途都夠飛轉台灣先。特別是香港依啲分秒必爭嘅地方，要依靠公共交通工具的話，留意周圍嘅交通情況係首要之選，買唔買得起車是其次，只是你買車再負擔唔起多一個車位了。

依個時候，你唔洗怕經紀會呃你，因為佢一定係呃你，存心果隻。

經紀話近西鐵好方便呀，但係要打醒十二分精神，諗清楚你每天嘅目的地係邊，須記得方唔方便都好depends on你每日要去邊。

以肥妹在觀塘工作為例，西鐵對於我黎講真係個災難，先上西鐵線轉紅色地鐵線再轉綠線，再諗諗地鐵嘅人頭湧湧同爭先恐後，加上可加可減但唔會減機制，我完全失去住係度嘅意慾。

又，經紀會同你講有巴士，其實老老竇竇，佢都唔知有幾多號巴士經邊度搭幾耐有無特別車，始終佢都唔係住係度，日日人云亦云講返俾你知：

「係有車出市區」

「咁荃灣有無？旺角定黃大仙呢？」

「你等我睇睇先。不過話時話其實個市會升返，有心買就要快。」

⋯

經紀會講你知，好方便好方便真係好方便，佢話係呀依度係屯門嘅中心黎，個名叫新屯門中心（離市中心有啲遠咁啦）。佢又會話你知依度多嘢賣好旺唔怕買唔到嘢，然而唔會講你知入夜之後牛影都無隻（留意返，屯門是無牛的），到時放工返到黎搵粒米都無。

如果市區人入黎屯門元朗天水圍睇樓，必須留意香港雖小，但由依度出市區，係需要飛去台灣嘅時間距離。

結論係：同一個人結婚都需要俾啲時間認識一下佢嘅性格背景，問下佢嘅弟兄姊妹朋友同事，買樓都係一樣，認真上網做下research，好似旅行前都會做足功課一樣，認識下附近交通飲食等，最好梗係有個住開果頭嘅朋友，可以向佢探下路，問下邊頭有宵夜好食都好呀嘛～

肥妹睇樓初體驗一

肥妹睇樓初體驗二

原文刊於肥妹facebook專頁，獲授權轉載，標題經編輯修改，原題為「肥妹睇樓初體驗三」。