那些年我被人叫阿妹的日子

廿歲開頭，剛跳出校園，踏入社會，好似好多嘢都好新奇；廿歲過咗幾年（或好幾年），營營役役，老嘅味道慢慢滲出，初老已經不知不覺來到你的工作中。

有些事，漸漸就變得不同。

由被叫阿妹到叫人阿妹

剛出社會工作，可能「阿妹」感覺親切，又或者人地根本廢事記你個名，通常都以「阿妹」稱呼。

可能「阿妹」感覺又真係幾親切，所以都唔介意俾人叫「阿妹」。我諗：

總好過俾人叫「阿姐」或「阿姨」嘅。

但，唔知幾時開始，長江後浪推前浪，你由公司入面年齡最細嘅「阿妹」，變成，未係「阿姐」，但已經唔妹嘅位置。「其實我都係做咗半年多啲」「但都耐過我啦師姐」。雖然唔係喺公司待很久，但比起「阿妹」，的而且確係時間比較長。

望住嬌滴滴、稚話連連、不停問「點解嘅？即係點呀？」嘅「阿妹」，原來，真係忍唔住叫人「阿妹」。

由受教到授教

fresh grad果個時代，剛入公司工作，應該係抱住好多嘢學嘅心態，對所有事物都好好奇，好想發現：

有咩我會識架呢？

連用部影印機都覺得好新奇。就好似海綿一樣，不斷吸收新知。

但對於工作咗幾年嘅人黎講，返一份新工，諗嘅係點樣可以貢獻公司，對公司有咩價值。

就算你唔諗，公司都會問「有你」能夠帶到俾公司嘅轉變，壓搾一下海綿，要求獲利回吐。

廿幾歲，對事物縱使仍然留有好奇心，但唔係好想發覺「原來我好多嘢都唔識」。

新影印機，你最好唔洗人教都識用啦。

由處理自己、事到人

一開始返工，真係只有返工。準時返工，處理好上司俾你嘅工作，就一了百了。

從前只會想，只要做好事，其他人又奈我咩何？

漸漸地，發現要處理嘅事愈來愈多，愈來愈複雜，要面對嘅對象都愈來愈廣。

而且，人事人事，人和事原來真係分唔開，要處理好事，先要處理好人。

情況就好似，小學生答選擇題，岩就岩，以正確答案評分，滿分就滿分；到中學，原來有樣嘢叫「open question」，無滿分答案，評分的，還是人。

轉工，唔想轉返同一個梯圖(編按：title)。

做咗幾年嘢，有返些少經驗，好似係時候「甩p」。抱著都廿幾歲，而唔係廿零歲嘅年齡，唔係話好老，但絕對唔係少年太年輕嘅年齡。

轉工時都會諗下，好唔好搵份再無「assistant」梯圖嘅工作，又或者將「assistant」搬去梯圖嘅最前，又或者搵份最好有assistant嘅工作喇。

最後，亦都是最sad

填寫個人資料，通常年齡果行係有得揀年齡層，再唔係「18-24」，要再碌落一格「25-30」！！！

依個設計，果種大一歲就大一截嘅感覺！真係非筆墨所能形容！！

而且好多target 18-24年輕人嘅廣告我就再睇唔到喇嗚TT。

原文刊於90後博客肥妹 facebook，文章獲授權轉載。標題經TOPick 修改，原題為〈廿幾歲的工作初老症〉