張晨：考完試對答案係一條不歸路

我嘅公共試年代，有條友叫David。佢其實同我唔熟，只係「自修室朋友」。而佢當時有一個行為，令我印象深刻。就係「對答案。」每次考完一科，佢都會即刻周圍問人

你第一題點答呀？
 

我有23個答案都填C！你呢？

佢對答案嘅渴望程度簡直到達痴漢級別，甚至係痴線。不過香港都冇咩正常人，我聽佢講得咁興奮，突然都諗咗一秒：

頂呀，我好似得10個C咋喎！

好喇，份試卷就一樣，你有10個C、佢有23個C。即係我同David仔之間，其中一個至少錯咗13題！差在邊個「中招」。（當然可能兩個都錯。）

唔聽由自可，一聽就唔想錯。於是我企喺身，講一句：

冇理由咁多C喎。

哇，呢句好似挑動起佢嘅原始獸性，令佢用挑逗嘅目光答我：

不如，研究下啦。

我可以用過來人身分同大家分享，呢一句簡直係「不歸路」。

記的我哋由第一題開始研究，David甚至搵埋啲名師答案（啲補習老師好興即刻做完份券放上網，聲稱啱9成。）

愈對我就愈心慌。因為自己以為啱嗰啲原來係錯，以為係錯嗰啲⋯⋯真係錯……

嗰時我面對嘅係會考，賽程緊密，由於我文理科都有啲，搞到10日考8科。當日對答案對咗兩粒鐘、唔開心咗一個鐘、絕望咗半個鐘……抬頭一望，都係時候返屋企瞓覺。

咁嘅精神狀態，第日嗰科自然都變一鑊粥。但我學乖咗，David條粉腸再對答案，我就話

你對答案，我就出去溫。

保持情緒嘅平常心。後尾我先發現，當日David「話我一定錯嗰啲」，原來係我啱。甚至嗰啲「啱9成」嘅名師，都錯唔少。

講真，考都考完，就算錯就冇得改。又何必令自己難堪？不如養足精神，諗下第二科點溫仲好。

即使如唔滿意自己表現都唔好諗埋一邊，考場試啫，仲後生！敢行入試場，嬴咗㗎啦！

原文刊於張晨（鳥不起）facebook，獲作者授權轉載，標題經TOPick編輯修改，原題為「考完試有人叫你對答案，呢個就係最危險嘅時刻」