百萬Blogger：上車應計算供樓能力

早前講座止凡兄講到因為我哋唔會估市，所以唔會做到封面人物，點知iM上期竟然俾我哋做封面，仲要事前我哋都唔知添！但係呢個並非驚喜，反而令止凡兄在fb受到一些負面評論，可能止凡兄唔慣啦，我就真係已經睇化晒！好似早前在電台聽到亞蘇（蘇施黃）講，入得娛樂圈就唔好睇娛樂新聞，唔係你會好易唔開心！所以如果驚自己會唔開心，最好就係唔好睇留言啦！

網友認真指正令我反思

寫Blog同寫專欄真係好唔同，因為睇Blog通常都是有緣人，都係搜尋關鍵字搵到我，所以多數是Blog的目標讀者，留言多是正面，但專欄就可能有少少唔同，而fb更是另一個世界，好多都係睇完標題就隨便留個言、鬧兩句就走。之前我都會好認真去回覆，但發現原來好多都唔會再回來討論，所以我都少回覆啦！

不過話時話，如果有得揀，我情願揀有幾十個人留言鬧我，都唔情願一個留言都無，因為就算鬧我都好，起碼都叫有人睇過呀！如果一個留言都無，我反而諗緊呢篇係咪廢人廢文，連睇都無人睇！而且我寫Blog除咗分享之外，其實都係想學嘢。正所謂教學相長，我在別人的留言中都可以睇到不同人有不同思考，從中得到啟發。

好像很早期我曾寫過，非工資收入/經常性開支大過或等於零，就是財務自由，幸得網友指正，其實應該是大過或等如一，所以有好多時我講的，不一定啱，我不介意讀者指出錯誤，可以令我反思一下，但有啲人為鬧而鬧，我咪時運高睇佢唔到囉！毋須介懷！

上不上車應計供樓能力

為避免人誤會我係「打手」，所以無論寫專欄或開班，我基本上都全數捐作慈善用途，話我為錢而寫，我更加知道佢根本連標題都未睇過，根本不用理會！啲人話我哋做「打手」，想搵人接貨，老老實實，我一個上車盤都無，所以佢哋應該未有資格接我的貨。

亦有人話唔明點解要捱30年去供層樓，咁我諗佢最好有機會問下依家60歲仲交緊租的人，問吓佢哋依家靠咩去交租？七十至八十年代啲樓咁平點解唔買？唔好再聽人講以前，以前幾平、以前幾易買，呢啲其實就真係廢話，要計其實要計每月供樓負擔能力！那些鬧過我的人，希望十年、廿年後佢會明白，我今日並無點佢，不過千祈唔好後悔，因為路係自己揀嘅！

我由開始同止凡兄合作，就知道我哋是同一類人，大家寫文只為分享而非為支持，亦唔需要人認同，只希望有人得到啟發。所以如果有一日，個個都話我哋講得啱、寫得好，嗰日就應該係我封筆之時啦！正如深水埗明哥話齋（邊個明哥你唔係唔識呀？）：「我希望香港唔再需要明哥。」

當然我唔可以同明哥比，但我都希望年輕人可以得到啟發，行少一點冤枉路，當然，時代不同了，我的經驗用作參考好啦！千祈唔好照跟呀！

全文刊於《iMoney智富雜誌》第442期（收費閲讀），標題經TOPick 編輯修改，原題為「寫文無求膽自大」

iMoney智富雜誌facebook