張晨：我實在無動力交稅

呢排睇住個綠色信封入面張報稅表，我實在冇動力報税，因為根本唔想交。

咩係税？

出糧畀政府，等政府有足夠儲備去做實事，服務香港人。

我今日好認真咁思量，有好多設施，我畀錢畀得心甘命抵，但環觀成個社會，政府有冇服務過自己？

首先望下幢樓，已經知道自己上車無望。

落街搭地鐵，連續7年賺錢照加價，政府有冇阻止？應該都係隻眼開隻眼閉。

返公司前想整個外賣食個快飯，都加到50蚊一碟，同老闆娘吹下水，佢話食物來貨貴都唔係大問題，租貴先大鑊。

不過呢間茶記都算碩果僅存，因為隔籬已經係「領展招牌」，多年為大集團鋪靚條路，逼走老舊細舖，每間都係連鎖店。

就算出咗份糧，都要拎5%畀佢玩強積金，同啲基金佬做世界，變相減薪。

放工途中，睇到政府做活動講香港街頭大小食文化，然後身邊嘅小販車被逐一推倒，食環掃場。

社會咪有個民意調查嘅「分數」，特首最新得分係 36.2分 ，唔止唔合格，直情係低點。

我成日諗，唔合格會點呢？

結果就係冇咩點，佢特首照做，嬲照呃。

咁不如賦予一個功能畀佢啦，例如低過40分，香港人唔使交稅之類，起碼有返個意義。

香港人好似孤兒仔。

或者，我哋並唔係服務目標。

咁樣，點解我哋要畀錢你？

原文刊於張晨（鳥不起）facebook，獲作者授權轉載。標題經TOPick編輯修改，原題為「諗嚟諗去，我都覺得唔應該交税」。