三高飲食運動 上網睇App自學活得輕鬆

健康 15:40 2016/07/21

分享:

三高纏身,部分過份擔心病人可能「乜都唔敢食/做」,而另方面覺得有病食藥就得的,又會繼續「乜都食/做」。事實上述兩個與高血糖(糖尿病)、高血壓或高膽固醇共存方法,都不正確,真正有三高應該點做?建議你上網睇App自學。

問心,針對慢性病的健康建議多數得4個字︰戒口+運動,但究竟應該吃甚麼?做甚麼運動才好?病人通常都一知半解,阿成亦不例外。剛踏入56歲的阿成,可說是高血壓+糖尿病新鮮人,他去年11月才知自己有高血壓,未幾更連血糖亦發現超標。

新病友:學完知有啖好食

「最初是睇病量血壓『擲界』,醫生建議買血壓機自家監測,結果我日日早晚量血壓,量了近兩星期都是持續上壓150mmHg/下壓110mmHg(正常血壓:120/80mmHg),高到自己都有點驚,便開始食血壓藥。」

忽然成為慢性病患者,阿成曾經擔心到乜都戒口唔敢食。(攝影:黃建輝)

其後跟進病情,再驗到他血糖偏高,反映3個月內平均血糖指標的糖化血紅素(HbA1c)高企8%,遠高於7%以下的理想水平,又要食藥控制。忽然三高中其二,他當然擔心,隨即變得稍為「肥」的食物都不敢吃,身體一瘦就瘦了10多磅,成個人落晒形。

例如我鍾意食粥、沙嗲牛麵、雞尾包,後二者憑感覺都知肥,當然唔敢再食,但食粥覺得都幾清啦,原來粥易消化升糖指數都高,對初期糖尿要做好病情控制,也有影響。

飲食運動:一站式自學

當下跟非病人的我,能夠解說得如此頭頭是道,他完全歸功於可上網篤篤篤的香港復康會「康程式e2Care」自學程式。

有糖尿有高血壓,我的確有很多鍾意的食物要戒口,但原來只要識得揀、食量控制好,我仲有很多選擇,像麵包可吃麥包、餅乾吃無糖的、去茶記飲檸茶可用代糖,而煮粥用糙米升糖指數亦已無咁高。

車仔麵湯底原來對血糖控制也有影響。

最特別是吃車仔麵的體驗,他笑言病後揀餸基本都是蘿蔔魚蛋時菜加米粉,就因為網上資訊提醒要留意餐後2小時血糖水平,他便每吃不同車仔麵店都篤手指。

原來有車仔麵店每次餐後血糖都可維持約6.5mmol/L(正常值:<7.8mmol/L),但另一間篤手指個數卻高見8.9mmol/L,由此可知麵食湯底對血糖影響很大,我要病情控制得好,也要親身試驗再細選可安心吃的食店。

至於教做運動那部分,阿成強勁推介上網睇片自學的方便性。

程式裡設定好晒初中高強度運動給我揀,可不停重播睇清睇楚才跟著做,即使做坐著動手動腳的帶氧運動,原來持續做得10多分鐘,一樣可以做到中等運動強度感覺(少少氣喘流汗又能說話),對血壓控制有幫助。

坐著做的帶氧運動,阿成指持續做得10多分鐘,也會出一身汗。(攝影:黃建輝)

事實參考自學程式資訊後,阿成的病情控制很不錯,血糖水平維持穩定外,血壓藥更可由日食一粒減至半粒,有別於三高病友藥物通常愈吃愈多的慣性,顯見自學程式對三高病情控制有正面作用。

免費活動:高血壓自療工作坊──運動篇

  • 內容:介紹最新網上學習課程「康程式e2Care」的應用,助高血壓病友掌握利用平台資訊自學做合適強度運動的技巧。
  • 日期:7月30日(周六)
  • 時間:2pm-4:30pm
  • 地點香港復康會社區復康網絡康山中心
  • 查詢及報名:2549 7744

下載方法:
Google Play→搜尋字:康程式e2Care

撰文 : 梁慧珍 TOPick記者