利嘉敏：「雞，全部都係雞」 真係咁好笑？

上周，有高登男在網絡貼上「雞，全部都係雞」的帖子，並譜上Richard Clayderman的《夢中的婚禮》，迅即瘋傳。

唔理點解但求就手？

如此低俗兼侮辱女性的一句話，竟有很多人話「好得意」要開心share，還有親子大合唱，實在匪夷所思，係咪天真同傻到咁，估唔到意思係乜嘢？抑或網民無要求到，唔理好醜總之求其有人整樣嘢就話有新意？

老老實實，真係咁好笑？倘洞察說話背後真意，你就未必笑得出。「雞，全部都係雞」，乃今年中的高登潮語，起源於高登會員常以此句揶揄演藝圈女藝人或女歌星。後來網上「毒男」一遇失戀或食檸檬，亦用此句發洩侮辱女性。

豈料，有些女藝人及歌星仲矇查查，興高采烈拍片唱埋一份︰先有盤菜瑩子彈琴自唱，再有蔡卓妍和鄭希怡歌舞自high狂唱——此情此景，不禁暗忖︰佢哋知否自己其實笑緊邊個？知否自己做緊乜？只要稍稍留意並沒有男藝人或歌星敢出來就此句抽水搞笑就應該知咩事。

有無經理人可叫唱到不亦樂乎的女星「停一停、諗一諗」呢？從沒奢求香港演藝界會出個像Emma Watson般的高材生、肯為爭取男女平等而甘願暫退熒光幕後一年的人物；但歌詞白成咁，若真係唔知，豈非好無知？有謂近年演藝界質素倒退，並非無迹可尋。

連難民署都玩到咁？

數日後，聯合國難民署香港辦事處在其官方fb這樣寫道︰「雞，全部都係雞~全部都係雞~在南蘇丹，流離失所的小男孩正在賣雞。『你想買一隻嗎？只需60鎊（南蘇里鎊）。』他們問難民署的工作人員……絕大多數人仍然無法負起基本的食品，如大米和糖。立即捐款支持，為難民提供生活所需。」

頓時眼都大埋（其實係「反」埋），假設寫文案者不知此句原意，也該能判斷「雞，全部都係雞」之低俗。又假設此君不覺低俗，也應想想引用此句跟叫人捐款有何關係？ 唔係諗住咁樣會打動到人啩？

此亦反映現今做social marketing（社會市場營銷）的三大盲點︰

1. 唔知頭唔知路、唔理網上流行語句背後乜意思乜來源，總之多人講就諗住「食住個勢」趕「潮流」，但求吸引眼球就以為掂；

2. 無諗過語句跟自己機構的形象全不配合；

3. 更無考慮到語句運用同自己想達到之目的（如捐款或簽名支持） 毫不相干。

【其他熱話】你有無口臭？4 個自我檢查小方法

【其他熱話】李照興：朱婷最強撒手鐧是現場存在感