張晨：當「隱世」變成「獻世」

「大東山啲芒草，今年少咗一半。」行咗90幾年山嘅朋友阿強同我講。

我問：「因為啲人冇公德心？」

佢搖搖頭：「垃圾係另一個問題啦......山呢家嘢，多人行就係咁。冇話怪得邊個，多人行，塊地咪禿囉。」

佢再講：「香港哋，一畀人用『隱世』呢個term套住，都係冇咩好結果。」

都係，咩隱世韓式芝士、隱世冰室、隱世靚絕風景、隱世玩具店，

一隱世，立即獻世。

喺香港，我哋嘅文化就係一窩蜂同趕潮流。趕得快，亦消耗得快。排長龍、清倉、一車一車咁攻陷山頭。

▲ 相片來源：張晨 Facebook

難怪近年朋友們喺Fb貼啲食物相，有人留言問「好正，喺邊㗎？我又去」。

會得到一句答覆：「唔講啦，人哋想做下街坊生意就算。」

【延伸閱讀】中大解剖室主管：「無言老師」成就了醫科生

無錯，有啲手藝唔求大富大貴；有啲山頭都冇打算人山人海。

總有啲嘢，係真心想「隱世」。

但媒體報導一啲值得去嘅地方亦唔係錯，只係撞正我哋「一窩蜂」嘅文化，令一啲好地方被慢慢蠶食破壞。

但阿強話，多人知多人Join，並唔係壞事。佢都冇諗過要霸住個大自然，只係「真正愛好者」同「趕潮流嘅人」，心態唔同。

佢話：「呢個山，我諗住行一世；但佢哋只諗住行一次。」

諗住行一世，就唔會亂掉垃圾，唔會拔走芒草，會錫住，因為你知自己會返嚟。

【延伸閱讀】林超英：守護郊野公園不能只叫「保育」妥協

但一開始就假設自己行一次，影相就完，唔會再嚟，咁變成點都唔關你事。

你唔需要有後顧，於是盡情消費，個水樽一掉就來生再見，慢慢，個地方就玩完。 往往潮流帶嚟嘅人流，快來快去做成嘅破壞，承受嘅都係一班會「回來」嘅愛好者。

我哋嘅文化好難話改就改，阿強唯有求一樣嘢：

行得上呢個山，試下同自己講會行多次，而唔係行一次。如果真係鍾意，嘗試愛上呢個潮流，而唔係永遠隨波逐流。

原文刊於張晨（鳥不起）facebook，獲作者授權轉載。

【其他熱話】50磅狗女兒行不得 爸爸揹上山看世界

【其他熱話】歲半BB遠征龍脊 小肥媽：地方美麗適合家庭樂

【其他熱話】中大解剖室主管：「無言老師」成就了醫科生