分娩大作戰:我用17分鐘誕下BB

親子 18:24 2017/02/01

分享:

經常被問,生仔痛唔痛?痛左幾耐呀?究竟有幾痛呀?而最多人問就係我究竟點樣用17分鐘生左個b出黎。17分鐘係第二產程(即係可以用力生bb到bb出世),一般都是30至60分鐘完成。

我係一個怕痛怕到𠝹損手指都貼足一星期膠布嘅人,但我可以講,只要有足夠準備,生仔真係唔係好痛(我完全無用止痛方法,連笑氣都無聞),只係似便秘左一星期而終於要谷出來咁 。今次第一胎係香港生,就係希望係自己地方有更好準備同經驗。

【延伸閱讀】BBC剖析真人個案 孕婦壓力大影響BB智商

1. 陣痛喇入院喇

其實如果你無穿水見紅,但有規律性陣痛,係唔使咁快入院的。因為係香港,如果你只有正常陣痛,基本上子宮未開,公立醫院係會叫你番屋企,咁樣一來一回準媽媽只會更驚。私家醫院當然會俾你入,不過我個人比較喜歡係屋企等多過係醫院,而且可以慳番晚錢,符合荷蘭人「節儉」美德。

我生之前好緊張唔知點係穿水見紅陣痛,但到時到候,你一定會知,所以準媽媽無須擔心!

我生之前一晩晚上十點半第一次陣痛,每十分鐘一次。到零晨兩點每六分鐘一次。到零晨四點九我見紅,去沖涼,食埋碟餃子。六點鐘,我先叫醒我老公,七點出發去醫院。去到果然只開兩度,淡淡定我仲自己行上候產病房唔使坐輪椅添。當晚七點多啲我就生了。

【延伸閱讀】孕婦清胎毒飲食宜忌 過早清胎毒易早產?

2. 必坐瑜珈fitness ball

準媽媽請一定要買!有唔同大小的,可因應自己高度選擇。

我自懷孕第四個月開始,每日都坐15至20分鐘,有助糾正胎位,又可以幫助準媽媽產程更順利。雙腿張開至與肩膀一樣闊坐在球上,盤骨打圈,亦可把腿張開到最大,坐在球上左右動,陣痛時亦可坐波舒緩緊張情緒。

香港私立醫院大部分無供應瑜珈球,所以我自己帶去醫院。公立醫院就好多都提供,並支持自然分娩。

3. 多走動,多做運動

如果產檢一切正常,懷孕期間可以多做運動。快步行,瑜珈同游水都係我懷孕期間常做的運動(未懷孕前我基本上零運動),所以懷孕時我基本上無水腫,生得快復原都快,而且仲肥胎不肥身!

【延伸閱讀】BBC拆解胎兒成長歷程 懷胎第15周定孩子性格

4. 拉梅茲呼吸法

Youtube有大量教學,請每一日都練習十分鐘!熟能生巧,再痛你都會記得點呼吸!

【延伸閱讀】花膠海參燕窩是孕婦滋補佳品?中醫:孕初期不宜食花膠

5. 自然的自然分娩是最好的

其實你媽媽,你媽媽個媽媽,你媽媽個媽媽個媽媽都係咁生你出來。生仔的痛,痛不至死,係每個人都承受到的痛。準媽媽俾啲信心自己呀,勇敢啲!

醫生細佬千叮萬囑我唔好用無痛分娩(epidural),因為產程會加長,而大部分人亦會有背痛的後遺症。而揀得係私家醫院生,我預左我堅持自然順產唔用無痛會係異類。果然,醫生護士問足我十次......真係十次,用唔用無痛,諗起都嬲......我當然係say no。我估唔到既只係自己連笑氣都唔使用,音樂都唔使聽,而係bb 面向右嘅情況都生得咁快!

準媽媽們,其實以上準備已經好足夠,無須自己嚇自己不斷上網睇生仔片。最緊要保持心境平靜,好好enjoy 懷孕同分娩過程,咁就生仔無難度喇!

仲有,各位準爸爸媽媽記住執下個樣先好影附圖嘅第一幅全家幅,唔係就好似我地咁要打格仔先見得人。

以上文章純屬個人分享,生育分娩人人不同,大家可作參考。

【其他熱話】兒童儲蓄戶口大比拼 邊間銀行開戶金額最低?

【其他熱話】帶子扇貝哪些部位不可以進食?

【其他熱話】睡眠姿勢大盤點 側睡會加速皮膚老化

全文刊於港b港媽荷蘭爸爸Facebook,獲作者授權轉載。

撰文 : 港b港媽荷蘭爸爸