鄭丹瑞:誰是下位搞教育的專業人士?

親子 11:33 2017/02/06

分享:

薯片叔叔對外國傳媒說,假若他當選特首,其中一件最重要的事情,就是請專業人士處理教育政策。我不想去推測薯片叔叔這一句說話的潛台詞,意思基本上就是「阿媽係女人」。

無論哪一個做特首、無論所得到的選票多或少,都必須制定一套教育政策大方向,而這套教育政策大方向,當然需要一個對教育有認識、有經驗、有理念的專業人士來處理。

「咁我又好奇喇,我哋依家嘅教育局局長,佢又係咪一個專業人士呢?佢又有無教育理念嘅呢?」損友甲問。「佢當然有教育理念啦!」好事之徒代答:

佢嘅教育理念就係『求學即是求分數』吖嘛!政府用35億起一個A貨故宮博物館,但係局長強調嘅咩TSA、咩系統評估,有無評估一下到底藝術係乜東東?假如有一個學生,志願係想做另一個美斯,佢同老師講:學校可唔可以俾佢上多幾堂體育堂?你估學校會點樣反應?家長會點樣反應?

好事之徒清清喉嚨,續道:

聽講依家唔少學校,直情取消體育堂,用嚟做咗TSA操練時間,學校嘅籃球場、足球場,都改建成為溫習室。呢個就係今時今日香港教育政策嘅大方向,想做美斯、朗尼,只能夠睇西甲、英超,做一個觀眾;想做音樂家,只能夠上網聽聽K-Pop,做一個聽眾;想成為一個藝術家,去A貨故宮參觀,做一個遊客。

至於想喺課堂學到呢啲嘢?對唔住,欠奉!因為我哋嘅教育政策,相當專業。

到底誰會是下一位搞教育的專業人士?我好好奇。

標題經TOPick編輯修改,原題為「專業人士」。

【其他熱話】中文記憶法 急救孩子測默背誦

【其他熱話】分娩大作戰:我用17分鐘誕下BB

【其他熱話】UPS前高層開禮儀學校 1.5萬元8堂教港孩待人接物

撰文 : 鄭丹瑞