面癱後更關注身體　張達倫3招尋回健康生活

張達倫於2004年入讀第19期無綫電視藝員訓練班，其後簽約加入TVB，多年來一直在主角身邊行行企企，直到2012年參演處境劇《愛．回家》飾演律師嚴謹才被觀眾認同，於今年上半年接續播映的《全職沒女》及《不懂撒嬌的女人》更有亮眼表現。

▲ 「起初入行我好膚淺，自覺夠高高大大、樣子OK又型，便想做古天樂。其後發現做古天樂都要花好大努力，愈來愈知道要裏面『有嘢』，才有機會達到一些目標、成績。」張達倫相信機會總留給有準備的人。（陳偉能攝影）

看書觀照人生投入角色

張達倫謙說以前無論多盡力演繹角色，最多都只可做到70分。

因為好多事都未handle到，而家則可做到90分，開竅位就是將累積回來的感受，去投入角色的世界。

▲ 愛看書觀照人生的張達倫，近期除了捧讀張德芬的《遇見未知的自己》，還有這一本。（Kristy 攝影）

他做人演戲都好講求「感受」兩字，愛閱讀可以讓他觀照感悟人生，拓闊同理心，自然更能進入角色。

最近睇張德芬的《遇見未知的自己》，她便解釋得好好而啟發到我。

另一本隨時睇的就是《不被情緒左右的28個練習》，無論人幾淡定都好，到了某個特別場合總會緊張，為何會緊張？緊張時可以點做？這書學習了解自己、別人的情緒及小動作，對演戲好有幫助。

至於祥哥（黎耀祥）寫的《戲劇浮生：黎耀祥論演技與人生》又係好正，完全是我們當演員的工具書，教人如何睇戲、做戲，我每一次睇都有不同感受與得着。

有人說張達倫現在連嘴角都識做戲，全因他百分百感受到角色、與角色合體。

飲食清淡愛食魚

10多年前曾患面癱（三叉神經遭細菌感染）的張達倫，回憶當時病情仍猶有餘悸：

一日突然覺得臉龐好痺，幾日後更feel到冇力，立刻睇西醫、服用類固醇，那時試過痛到食飯中途都要返屋企休息、情緒差到終日發脾氣，幸好其後醫好了，到現在都一直keep住用針灸調理。

▲ 戲內戲外，張達倫與黎諾懿都私交甚篤。（《不懂撒嬌的女人》劇照）

自此他更注重養生，保持常做運動的習慣，戲內戲外都私交甚篤的黎諾懿便是他打羽毛球的「波友」。

我一直有keep住做運動，踢波、跑步、游水、健身輪住做。你知啦，現在如果唔夠fit好大件事，因為個個男藝人一除衫都好勁，成個Iron Man，但我自己又唔鍾意太大隻、『一嚿嚿』，盡量想keep住有muscle便可以。飲食方面一向食得好清淡，蒸條魚已好OK。

戒煙多年的張達倫，除了為健康，原來還有一個抱負：

以前好多人都覺得做娛樂圈這一行的人，大多不太健康、愛情觀又好開放。

個人認為我們需要以身作則，讓其他人知道我們並非想像般『曳』，其實圈中人比以前健康了好多，感情世界大多保守過圈外人。

場地：Kerry Hotel
服裝：WAGAMAMA PLAYGROUND

【延伸閱讀】絕世暖男王浩信是如何煉成的？

【延伸閱讀】《流行經典50強》鄭敬基：家庭比事業重要

【延伸閱讀】《流行經典50強》女歌手 單親媽媽何婉盈：為女兒再踏台板