80後P牌媽咪：三大懷孕Apps推介
發布時間： 2017/06/26 11:59
最後更新： 2020/05/18 12:53
一如好多打工仔，Audrey每日返工放工，都要花兩個鐘喺交通工具上。懷孕期間，感覺特別漫長，所以不時把握搭車時間，閱讀懷孕資訊。以下三個手機App，喺陀B路上對我幫助好大，特別推介︰
1.《280days》（最好玩）
功能︰設計靚，集日記及健康記錄功能於一身，可記錄體重，並作產檢提示。
賣點︰輸入預產期後，就可透過手機邂逅你嘅虛擬BB，佢會同真人一樣日漸長大，透過說話向你介紹佢喺呢個階段嘅生長狀況。兩公婆可以共用帳號，以相片和文字撰寫自己嘅懷孕日記，同另一半分享、打氣，增進感情。
2.《喜程》（最實用）
功能︰由醫管局推出，含大量實用文章、醫院資料，另可記錄血糖、血壓指數和作產檢提示。
賣點︰若你會到公立醫院做產檢或分娩，此App可謂必備！佢提供各項公院服務嘅解釋及須知，例如乜嘢係唐氏綜合症篩查，並會以Q&A方式解答妊娠不適、營養攝取、分娩、產後及初生BB護理等疑問，簡單清楚。
3.《Pregnancy & Baby | what to expect》（最生活化）
功能︰英語介面，有好多實用貼士，會按懷孕周數提供虛擬短片話你知BB嘅生長狀況，並設討論區畀媽媽們交流。
賣點︰題材多元化，例如會講下懷孕期間可否做facial、脫毛，好生活化。另可從西方角度了解懷孕注意事項，例如華人社會傳統認為大肚唔好食芒果，因會引起敏感，外國人卻將芒果列為對孕婦有益嘅十大食物，不妨互相參考。
【其他熱話】花膠海參燕窩是孕婦滋補佳品？中醫：孕初期不宜食花膠
【其他熱話】要懷孕先要戒香水 麝香樟腦是胎兒殺手
【其他熱話】一圖睇晒孕婦飲食禁忌 點解要戒香蕉薏米？
全文刊於《晴報》
晴報facebook
撰文 : Audrey Ng 80後P牌媽咪
