我的懷孕日記 健康院產檢會驗甚麼?

親子 13:07 2017/07/17

分享:

之前分享過,第一次去健康院做產檢需經過四大步驟︰首先係量度身高、磅重、驗小便、量血壓;第二係見姑娘了解病史;第三係醫生檢查及聽BB心跳;最後係抽血。過程中姑娘並無仔細解釋各步驟嘅用意,所以第二次去時,我把握機會向我嘅主責姑娘求教,又透過醫管局單張釐清咗幾項疑問︰

問︰點解驗尿時,會建議孕婦帶每朝早餐前第二泡尿來驗?

答︰有啲媽媽前一晚可能食得好豐富,第二朝起身,第一泡尿嘅驗尿未必反映實況,所以建議保留第二泡尿去檢驗。至於點解要喺早餐前取尿,同樣唔想畀該餐飯影響化驗結果。取尿前宜先抹乾淨外陰分泌物,保留中段小便來驗。

問︰驗尿時姑娘會派發兩張試紙,其實用嚟驗咩?

答︰驗尿糖及尿蛋白,若懷疑有妊娠糖尿或蛋白尿,就需要進一步檢查。

問︰第一次喺健康院抽咗三支血有咩用?

答︰除咗用來辨識你嘅血型、Rh因子,仲會驗血色素及平均紅血球容積,睇下你有無「地中海貧血」或「缺鐵性貧血」。

另亦會驗下你有無德國麻疹抗體,若於陀B時感染此病,有機會誕下畸胎;同時睇下你係咪乙型肝炎帶菌者,並幫你做愛滋病毒抗體及梅毒測試,以防媽咪將病毒傳染BB。

題外話,懷孕初期老公擔心我唔夠營養,買咗一樽Materna孕婦維他命丸畀我食,坊間售約$200,原來健康院可免費提供!Audrey拎過一次,院方畀咗約三個月分量我。各位媽媽有需要可向姑娘查詢。

【其他熱話】80後P牌媽咪:孕婦完全不能飲咖啡?

【其他熱話】80後P牌媽咪:三大懷孕Apps推介

【其他熱話】80後P牌媽咪:未夠三個月唔講得?

全文刊於《晴報》

《晴報》facebook

撰文 : Audrey Ng 80後P牌媽咪