女人職場做得愈高會犧牲家庭？

呼，終於放產假啦！大學畢業後，都無放過咁長嘅假期，霎時間要我退下火綫，真係有啲唔捨得。

自問對工作上心，有時就算要OT亦在所不惜。我享受工作帶來嘅滿足，但屋企人就唔太欣賞我咁投入工作。有次阿爸仲話我︰「成日OT博升職咩？女人喺職場做得愈高，就會犧牲家庭。如果你升咗職，要爭取表現，睇怕都唔會生仔住㗎啦？」

我爸認為已婚女性應以家庭為重。事業？留番畀其他人拼搏啦。佢咁講我當然唔同意！點解女人花時間喺工作上，就係犧牲家庭，男人工作時間長，就係為家庭犧牲？點解要強行將我嘅事業同生仔時間表掛鈎？點解唔可以稱讚一下我嘅努力？

做囡嘅，點會唔在意阿爸點睇自己吖？不過成日諗住呢件事，盞自己唔開心，惟有佢有佢講，我有我生活，繼續按自己步伐計劃生育，安排工作。

最近我放產假，阿爸又好積極同我討論湊仔問題。之前佢明明希望我放多啲時間照顧屋企，但當佢知道老爺奶奶恨湊孫，口風180度大轉，叫我將個孫讓畀兩老照顧，唔想得失親家，認真搞笑，真係「龍門任佢搬」！

上一代對我哋總有好多意見，正如我對胎中BB一樣有唔少期望與想法，但我認為，父母唔應該做子女嘅司令官，而應擔任佢哋嘅教導者、同路人，喺子女成長路上循循善誘，輔助佢作出人生抉擇；即便佢選擇一條與你想法不一致嘅道路，依然與佢同行，而唔係一味追究孩子當初無聽自己話。呢樣係我放產假期間最大啟發。

全文刊於《晴報》，《晴報》facebook