爸媽不要隨意對子女說「唔好」　葉偉麟：信任令孩子更懂自控

十歲男孩，言談粗魯，性格衝動，喜歡玩打打殺殺的遊戲。在師長眼中，他沒禮貌，喜歡鬥嘴，極其反叛，對抗行為非常嚴重，嚴重影響同輩關係。

家長：「佢好鍾意駁嘴架，乜都包拗頸，成日好似為拗而拗咁。你叫佢行東，佢就永遠行西，總之就包拗頸。」

我：「例如呢？」

家長：「佢D脾氣好臭，遇到D唔如意仲會掉嘢，我一叫佢要控制吓自己，但佢反而鬧番我轉頭。」

我：「咁你有冇了解過佢嬲D咩？」

家長：「我梗係有問，要佢肯講先得㗎！」

我：「似乎你了解佢嘅內心想法有D阻力。......咁佢平時鍾意玩D咩？」

家長：「吓？！有關係嘅咩？ 」

我：「有時困住小朋友「真正嘅想法」，未必會透過「有意識」嘅語言表達到，反而會透過「玩」嗰陣，D「潛意識」就走晒出嚟。」

家長：「佢玩埋D打打殺殺嘅遊戲，拎D嘢係咁舞嚟舞去，然後就話我要劈死你呀打死你呀之類，佢係咪有暴力傾向㗎？」

我：「暴力傾向唔係「因」，而家你見到嘅狀態只係「果」。咁你有冇咩頭緒佢點解咁鐘意打打殺殺嘅遊戲吖？」

家長：「係咪睇得D暴力片太多呀？！我已經講過十萬九千次，叫佢唔好再睇，但係佢好似想激死我咁，越叫佢唔好做，佢就越要做，你話我可以點吖？你話我可以點吖？」

我：「你好擔心，所以先咁激動。你似乎覺得透過「控制」小朋友，佢就會學識「自控」？」

家長：........

我:​「你有冇試過發你父母脾氣？」

家長:​「都有.........有邊個仔女冇發過阿爸阿媽脾氣架。」

我:​「咁你當時最渴望父母做D咩？」

家長：「理解我囉。」

我：「咁你有冇向佢解釋，等佢哋理解你多D？」

家長: 「梗係唔會啦，講咗佢哋都唔明架啦，總之乜都要照佢哋說話去做，講嚟做乜。」

我: 「唔......其實覺得自己小朋友唔同你講嘅動機，會唔會同自己一樣？」

家長沉默不語。

男孩來到治療室，最能引起他的注意，正是不同類型的玩具劍。男孩有點衝動向我揮劍，同時亦希望試探界線。

男孩：「我殺~~ 我劈死你~~」

我: 「你似乎好鍾意玩劍喎。不過我哋唔會傷害對方，你可以選擇劈嗰邊隻大熊Bear Bear!」

男孩頓一頓，然後用盡氣力，不斷斬殺大熊Bear Bear, 一瞬間，他的能量被轉送到一個安全平台表達出來。

其實在現實中，我們家長都很「害怕」小朋友「不受控」，結果在不同層面上選擇了「禁制方式」，令孩子心底裏充斥着許多大大小小「No」「Don't」的規矩及框架，反而欠奉了一個「Yes」的環境讓他們表達，更遑論了解他們的內心世界。

男孩往後的日子不斷重複上演相同「劇情」，唯一不同的是，頻率及激烈程度漸漸地下降了。

男孩:​「點解唔阻止我玩D刀劍嘅？平時喺屋企都冇得咁玩嘅。」

我:​「我覺得你自己控制力好好，而且無傷害到對方，點解要阻止你？」

男孩瞪着我良久，似乎釋懷了。

後來男孩自控能力更好，不但沒有破壞規矩，更不斷向我示範各種武術。

我:​「嘩，你個動作點做倒架？我都想學呀。」

男孩：「好簡單架咋，等我教你啦。」

我：「你控制力好好，好有運動細胞。」

男孩以慢動作示範，更充滿耐心地指導我。

他彷彿變成了武術指導，透過主導，及充滿自控的慢動作，他不知不覺已學會了自我控制。說穿了，他的需要 (NEED )是 POWER，可惜在現實中，在家校也不斷受壓制，未能正確消化負面情緒。

後來有次男孩提議：「不如整一個劍套，把劍咪唔會咁容易爛囉，又唔使驚人哋唔小心攞到會整親手！」

我： 「好提議呀！」

我們合作用雪條棒和陶泥做了一個劍套。男孩很滿意自己的作品，展露燦爛的笑容。

家長：「佢呢排冇晒D郁手郁腳，又唔會駁嘴駁舌，你點樣敎佢架？」

我：「我就係因為成日同佢郁手郁腳囉。」

雙刃劍，看似很鋒利，很具殺傷力。

但透過信任，賦予孩子POWER，反而有機會令他們更懂得 SELF CONTROL。

文章獲葉偉麟 兒童行為情緒治療師授權轉載，詳情可按此瀏覽。

【更多育兒心得】

【延伸閱讀】「唔輸得」男童輸遊戲會打人：我最開心就係贏

【延伸閱讀】做父母少了私人時間　劉美娟：是「選擇」不是「犧牲」

【延伸閱讀】超人媽媽「一拖四」環島遊35天　讓孩子用力玩啟發想像力