鄭丹瑞:選擇「值得信任的人」是門大學問

休閒 13:33 2018/10/22

分享:

鄭丹瑞專欄指,不要輕易信人。

為好事之徒家中做了十年的外傭,辭官歸故里,回菲律賓跟家人團聚。上個月,他迎來人生中第N個外傭,外傭抵的第一分鐘開始,好事之徒就開始訓話,重點︰「記住︰在香港,千祈唔好信任何人!就算係同鄉都咁話。」

外傭唯唯諾諾,跟好事之徒說,她來香港之前,臨上飛機,曾經在香港工作過一段日子的auntie,告誡她同一句說話︰「在香港,千萬不要信任何人,就算是同鄉也不要相信她們。」

好事之徒在損友吹水大會上,講了這件事後,惹得一眾損友議論紛紛︰「係呀係呀!我個外傭來香港,我都係咁樣同佢講,真係邊個都唔可以信。」「我個外傭,錯信同鄉,借錢俾佢,結果自己無端端背起一身債!」「我那個更慘,信錯個男人的甜言蜜語,話會同佢結婚,騙盡她的金錢,還搞大了佢個肚,拍拍屁股走了!」

「好老實講,我又何止淨係勸告外傭唔好信人,我告誡自己的仔女,都係一句忠告︰千祈唔好信任何人!呢句忠告,好似好無情,實則好真實,但同時又好悲哀!」

好事之徒搖頭歎息︰「呢個世界愈來愈多人藉住你對他的信任,呃呃騙騙,首先呃你,跟住用你個名去呃你的朋友!真係防不勝防。」這個世界仍然需要有「信任」這回事嗎?當然需要。但是我們如何選擇「值得信任的人」,卻是一大學問。

撰文 : 鄭丹瑞