三姑六婆點解?

休閒 13:08 2014/11/04

分享:

早兩日阿史同秘書去食晏,隔離枱有幾個師奶係咁講某某師奶個仔娶老婆,講到七情上面,我差啲仲以為佢哋要嫁人。秘書食食吓就同阿史講:「好怕聽到呢類話題,因為過年個陣班三姑六婆一定講邊個仔邊個女結婚,之後就問幾時到你。」對於未嫁嘅秘書,呢個話題又真係幾唔啱聽嘅!

咁大家又知唔知點解鍾意講是講非嘅女性叫三姑六婆呢?。三姑六婆呢個用語,响元末明初嘅《輟耕錄》就有咁嘅記載:「三姑者,尼姑、道姑、卦姑也;六婆者,牙婆、媒婆、師婆、虔婆、藥婆、穩婆也。」所謂三姑,係指三種出家嘅女性,尼姑係佛教出家修行嘅女教徒;道姑係道教修道嘅女性徒、卦姑係專門占卦嘅女性。至於六婆就係六種職業女性,牙婆係販賣人口嘅人;媒婆即係媒人;師婆係求神問命嘅拜神婆;虔婆係妓院嘅鴇婆,即係扯皮條;藥婆係賣藥婆;穩婆就係接生婆。

簡單而言,三姑六婆係古代社會嘅職業女性。咁點解又會變成咗無知、鍾意搬弄是非嘅意思呢?喺古代,通常只有家庭背景唔好嘅女性先要投身社會,加上男尊女卑嘅風氣,所以當時社會對於職業女性相當鄙視。另一方面,六婆當中有幾個行業專門呃呃氹氹,所以大多數都能言善道,吹水能力一流,喺男士們眼中就覺得佢哋鍾意講嘢吹水,久而久之大家就將市井無知鍾意講是講非嘅女性叫做三姑六婆喇!

內容獲facebook專頁《史檔》授權轉載,原題為 :【俗語大解剖】三姑六婆

 

【拋書包系列】:

太空是甚麼氣味?

這些英文名,你識讀嗎?

發呆都有高低之分,聽過未?

「V煞」有段故

七俠五義係邊位?

警徽有段古,唔講,你知唔知?