980元1打學生相便能主宰命運?

City 16:01 2015/09/10

分享:

為人父母甚艱難,嫻姐自「升呢」做媽媽後,無論精神及肉體均由內到外,由頭到腳深深體會到,講來都一殼眼淚。

近排開學,嫻姐又聽到身邊嘅師奶朋友呻窮,話仔女開支大到嘔泡。嫻姐的皇帝仔讀公立小學,新學年的學費、書簿費及膳食費樣樣加,加幅跟隨通脹,尚算合理,又未至於大到嘔泡。

點解嫻姐班師奶朋友會呻窮呻得咁嚴重,背後肯定有原因啦!

1. 980元影入學照

嫻姐上個星期六帶皇帝仔去圖書館睇書,咁啱撞到隔離單位嘅朱太拖住兩歲幾peter仔返屋企,嫻姐見peter仔着晒恤衫、打埋煲呔,就多口問句:

朱太,今天着到咁靚,去飲啊?

朱太笑笑口話:

唔係,我帶他去影學生相之嘛,準備申請K1入學啊!

嫻姐平時最鍾意捐窿捐罅搵著數,知道樓下區議員有5元1打學生相優惠,就順口話比朱太知啦,點知朱太好大反應:

5元1打個啲相,點可以用來申請入學架!我專門帶咗佢去沙田影,專門影名校學生相個間呢,連諾貝爾獎得主都幫襯過架,成980元1打架!


樓下李太話,佢個女就係靠啲相,令校長印象加分,最後成功入到『維記』啊!

980元影12張學生相?嫻姐聽到肉都赤埋,但見到朱太臉上那個滿意的笑容,好似peter仔已經一隻腳踏入名校之門,嫻姐不便多言,拖住皇帝仔急急腳離開。

嫻姐計婆仔數好叻,但呢條數真係計唔掂,如果影980元1打學生相就可以增加入名校嘅機會,家長照辦煮碗去影,豈不是個個小朋友都可以讀名校? 

2. 買名牌衫面試

無論幼稚園還是小一入學面試,校方除了考小朋友外,都要考下家長,好嚴謹。

為了增加印象分,嫻姐都見過不少師奶朋友,節衣縮食特意購買名牌衣服「面聖」,爸爸穿A字頭的西裝,媽媽穿P字頭的套裝,再加條L字頭的頸巾,阿仔或阿女就穿套D字頭的童裝,未見官已先打三十大板。

嫻姐絕對明白嘅,社會很現實,先敬羅衣後敬人,全身靚「行頭」,固然能給人留下良好印象。嫻姐同時都想說,如果學校只以樣貌取人,忽略了小朋友及家長的性格内涵,這樣的學校不讀也罷!

3. 讀小太空人計劃

如果說朱太980元贏學生相、買名牌衣服面試的做法離地,朱太口中所講的李太可以算是離開地球的「太空人」。

李太的寶貝女兒考入「維記」後,李太可謂是屋苑師奶圈的名人,每逢幼稚園開始接受報名,屋苑的師奶都會向她「取經」,學一招半式。

坦白講,李太真的全身心投入去培養女兒,她原本在公司任職高層,為了培養阿女成材,她辭職做全職媽媽,每天圍住阿女轉啊轉,芭蕾舞、鋼琴、非洲鼓等興趣班只屬小兒科,她最近打算送個女去接受小太空人訓練計劃。

嫻姐早排聽到師奶朋友講,李太的先生最近炒燶股票,經濟周轉不靈,結果聽到李太提出想報讀小太空人訓練計劃時大發雷霆,但李太受到「麥明詩效應」影響,堅持即使賣樓都要報名參加,增加入讀女拔,甚至入劍橋的機會,成為下位一夜成名的麥明詩。

根據嫻姐八卦到的最新消息,李生李太最後沒有賣樓,也沒有放棄讓女兒讀小太空人訓練計劃。點解?因為成功入選小太空人計劃,是完全免費,只是李生誤以為學費好貴遮!

嫻姐都好很重視皇帝仔嘅學習,都好希望皇帝仔有朝一日會成為醫生律師。但我絕對不會認為,花980元拍攝12張學生照就可以3秒感動校長入讀名校,也不相信只要接受小太空人訓練計劃,便能成為第二個麥明詩,每個小朋友都是獨特的,而每個人都不能被複製。

撰文 : 都市嫻情