孫立民:為咗hea 你可以去到幾盡

職場 12:15 2015/10/28

分享:

一條生物題,性本hea,定性本勤?相信需要考TSA的小學生一定知正確答案。所以人不hea下枉少年。

hea同索K一樣,是會上癮,要愈hea愈多至頂到癮,有一日你冇得hea,朝九晚六都要做野,你會周身唔聚財,甚至典床典蓆,頭暈身㷫,想嘔等等現象。為咗hea,你可以去到幾盡?

你會不惜一切推job
成日蒲pantry
公眾假期前後必病或有親人去世
電話響扮聽緊另一條線
見到蒸餾水冇水,寧願口渴都不換,等有人換咗至出去斟水
話俾客聽自己開緊會
話俾自己聽自己超多野做

沒有最hea,只有更hea

Report,hea 寫:

資料不準確,結論沒有理據支持,日期銀碼都錯得,每段heading的font size 和font style 都夠膽不同

熱線,hea答:

負責嘅同事行開咗,我幫你唔到,你遲啲打過嚟,佢幾時返?我都唔係好清楚播

工作會議,hea開:

零準備,不帶任何資料,只帶成呎厚眼瞓和五公斤零食蜜乳,坐係老闆的盲點位(在開會攻略篇中才作詳細介紹),喪whatsapp同上FB

客,hea跟:

應承報價、電郵產品資料、送courpon…..,全都是火星任務,只把它帶回家,沒有送給客

老闆,hea佢:

呢單嘢我跟得好緊,日日都追IT部print個stat俾我,你知佢地….Marketing果邊又話唔夠筆直,唔肯book酒店…..不過,你放心,我一定死俾你…..,如果冇乜嘢,我返出去做嘢先…….

長期索hea,有一日你會發現有以下徵象:

尿頻、易倦、樣衰、腦退化、反應遲鈍、中圍脹大、夜晚瞓唔著(因日間瞓得太多)、上極都上唔到位、上極都上唔到車、溝極都溝唔到女、但晒份工有得hea,大好青年,沉淪hea海,萬刧不復!

Hea是賺咗?

Hea,除了是人性外,作為受薪打工仔,也普遍會覺得hea是賺咗,你俾32個半換我一粒鐘工作,如果我一粒鐘唔做或hea做,即係白賺32個半,一hea值三十蚊,愈是hea賺得愈多,好過買隻5號仔,由百二蚊跌到60蚊,我hea兩個鐘歸本。

這種思維就好像啪K一樣,帶你進入一個靈異虛幻世界,以為自己玉樹臨風、萬二蚊醒目,還於友儕間炫耀呃like,搵到份十個筍的工。

其實hea只是讓時光白過,沒有生產或只生產劣質服務,沒有增進任何知識技巧,但你的青春和年華卻如send出去的電郵,一去不能回頭,是賺是蝕?又是一條只值廿蚊的問題。

一匹hea馬,只得一樣貢獻,就是讓出位置,被後來者迎頭趕上!

Take Hea衰硬

最近看了「見習冇限耆」(The Intern),七十多歲已經退休的羅拔迪尼路重出江湖,在一間網購公司當見習生,雖然電腦、網絡等玩意對他是異形,但每天返工都用心認真,期待工作到臨,努力學習使fb,看不過眼當值時喝酒的司機,把公司內一世紀沒人清理的「雜物堆填區」執拾妥當(因沒有員工覺得自己有責任要去做),主動協助同事解決各樣難題,80後的老闆(安夏菲慧飾)原本看他不在眼內,但最終對他折服和尊重,並倚重他把公司業務再闖未來。

羅拔迪尼路滿臉縐紋,但一身陽光,從來都相信,先有成就,才有尊嚴!

企硬,Take Hea衰硬!

各位若遇到職場管理、辦公室政治、人際衝突、或前途抉擇等難題,歡迎留言提出。筆者會詳盡分析和解答,亦可瀏覽盈力僱員服務顧問網頁

撰文 : 孫立民 盈力僱員服務顧問首席顧問