張晨：你可能最唔想用而又會用嘅Emoji

任你細個嘅時候點臭格囂突、沙塵白霍 ，威震樓下公共休憩處，

但當你一出嚟做嘢，就會學識「跪低」！

而Emoji嘅出現，就令你除咗「心理上跪低」之外，連言語上都跪低埋。

講起「跪」，我都可算係專家中嘅專家。
因為於唔同工作上，我不時都「有求於人」。

世界係好現實嘅，返過工就會明白，

當你要人幫手嘅時候，對方嘅眼多數會高啲、語氣會硬啲、連Whatsapp嘅字都會打少啲。

為咗忠實地完成唔同工作，唔放過任何成功嘅或然率，所以你「三句唔埋、兩句就跪」。

一個Whatsapp，你加個「跪低Emoji」，成件事即刻有晒誠意！

一個唔夠兩個、兩個唔夠三個、三個唔夠加多個「雙十合手」，好似「組合技」咁又跪又拜。

為咗勾起對方嘅惻隱之心，我哋都可以去得好盡。

不過，好多時撳完呢個「跪低Emoji」，我個心都會赤赤痛…

因為感覺上，每用一次，份尊嚴就少咗幾分。

「明明我都有阿媽生！」有時心裡面會響起呢句。
咁緊係啦，不過大家個老豆唔同之嘛……

而且「有阿媽生」都只係生物學嘅一種必然程序，
你大聲啲嗌出嚟亦純粹多一種情緒嘅喧染。

簡單啲講，當你用biology去諗呢件事，就了解到「就算有阿媽生都係要跪嘅。快快手手跪咗佢啦好嘛？」

曾經我都應承自己，要愈做愈好，愈爬愈高！終有一日，我要永久封印呢個Emoji！

講得出就要做，爬嚟爬去（當然有時係爬返落去），都係走唔出「跪拜Area」。

你叻咗啲，並非代表唔使跪，只係由「跪呢個」變成「跪嗰個」。

唔會跪少咗，分分鐘難跪咗。

好快你就Get到，原來有啲人一出世，就處於「跪拜Area」嘅中心位置，擺明車馬天造地設，所以佢點都攞脫唔到「跪拜」。

同血統理論差不多，
有人一擘大眼就係王子，呢啲嘢好講緣份。

既然係咁，突然就覺得，自己呢啲人，又何必講太多尊嚴呢？

反正我同尊嚴都冇咩緣份。

自此之後，我默默跪底，成為「跪拜Area」中堅份子。

每次一用Emoji，映入眼簾，最常用嘅一定包括「跪」同「拜」。

古時嘅「男兒膝下有黃金」，都畀我改成「男兒膝下有條X」。

去到呢度，你可能疑惑

吓？完啦？唔係應該講埋有啲人擺脫到跪拜Area，畀返啲正能量咩？

唔係架，真係冇啦。

邊度有咁多正能量吖，童話故事都有黑暗面啦。

你應該都知，

社會上所有嘢都不受你操控，

而當中大部份只令你講粗口。

PS. 雖然個emoji正解好似係日本「土下座」，類似尊重，請求。不過一句講晒大部份人都當跪咁用啦~

原文刊於張晨（鳥不起）facebook，獲作者授權轉載。標題經TOPick 編輯修改，原題為「一個可能係你最唔想用，而又會用嘅Emoji」