有工返嘅幸福

返工既動力基本上分為，最根本既要維生養家，到努力賺錢脫離貧困生活，開始享受名利帶黎既特別待遇，再一直去到最頂層追求工作上既成就感，點樣令到自己head住既team甚至成個部門係公司「響朵」。

就好似我既部門主管咁，一份工打到老，做足三十幾年。如果叫佢跳出而家做緊既機構，以佢既學歷，一定無可能繼續搵到呢份令人笑呵呵既人工，仲可以日日準時收工伸手截的士接載返屋企咁巴閉。

係等緊退休既同時，就算做錯咩大件事，經理級都唔敢向佢大動肝火，更加由得佢平時以下屬出氣為樂，所以佢好鍾意返工，對人總係一臉幸福笑容。

每月既team meeting總結都係同一句

唔好當工作係一樣工具，你要當佢係身體一部分，係屬於你自己既，咁先識得點樣令佢愈來愈好，

如果我仲係一個fresh grad，或者會相信呢種癡人說夢。除非你係做sales搵到客仔可以有額外佣金收，先會想盡方法多勞多得，否則做一個係office加班無補水既白領，講呢啲有咩意思？

先唔諗自己會唔會選擇長做，突然一個裁員潮殺到，就算你平時幾咁有心機去寫paper，金睛火眼check report，好勤力日日整理files，臨訓前仲度緊橋第二朝開會用都好啦，為自保無人會願意企出黎幫你擋劫。

現實就係工作上可以取代你既人多的是，大家都認為有料既，自然會搵到新既據點。而你係電腦排列好晒既所有template和reference，只會白白送俾你下一手享用。

阿head又不停灌輸我地

要感恩得到一份工作，如果你唔出盡力去付出有既能力，就會對唔住俾機會你既人，

簡單黎講，要完美地完成所有工作兼討佢歡心囉。係既，工作機會未必輕易得到，不過公司同員工係互相需要，可以請到一位肯賣力既好員工，亦係公司既福氣。

佢就明白遊戲應該係點玩，曾幾何時，一定同我地一樣辛苦又受氣。就係捱足咁多年，終於沾上老油條既光，唔洗再面懵懵去托人大腳，唔洗再爭取出鏡機會搏上位，唔洗再怕突然炒魷魚無得撈。

講句「俾機會啲細既學下野」，就可以卸除一半workload。各式各樣既食飯俾面派對，要俾錢既就奉旨唔出現，睇啲經理識唔識「敬老」啦！工作上有出錯，當然出動A字膊，大家明知真相又奈佢唔何，佢就活生生將自己既幸福建立係人地既痛苦身上。

小熊好卑微，返工的確為份糧。曾經有好多被自願既add-hoc task有認真落手落腳去做，但係結果係無人知道額外付出之餘，仲要被壞心腸既同事耍。

一發覺有呢啲現象，請即時抽身！唔想返工前一晚再心驚膽跳，就要保持番個距離，無須事事上心，離得開一啲，反而對成個工作環境入面自己既角色睇得更清楚。其實小熊返工無遇到大災難，已算係萬幸中既大幸啦。

文章刊於作者HR熊 - 職場航行日誌 Facebook及個人網頁，獲授權轉載。