坦白的港女你愛嗎？

你竟然比你TB頭張相你男友睇！你唔驚佢對你無晒幻想咩？」Crystal驚訝地說。
 

車，TB頭又點？唔通佢因為我以前樣衰就唔要我咩？Brenda氣定神閒地說。

拍拖點都要扮下嘢o架！要洗底！Crystal肯定地說。

我不嬲對男友都好坦白，連唔識煮飯唔識做家務呢d缺點都一早話晒佢知。Brenda毫不在意地說。
 

你都得o架喇你，到時比人飛唔好喊住嚟搵我。Crystal說。

晚飯後Brenda回想起剛剛與Crystal的對話，越想越淆底，究竟自己是否真的對男友太坦白呢？無疑懂得煮飯和做家務實在是可以增添不少分數，但原來真的這麼重要嗎？

難道真的要像Crystal般收起自己的過去，再扮演一個十全十美的女人嗎？她又自覺自己做不到，平日工作已經要戴假面具做人，面對喜歡的人，她只想做回自己。

其實。。。你會唔會介意我唔識煮飯？Brenda禁不住問正在修理電腦的男友。
 

癡線，如果我介意就唔會同你一齊啦，我去搵個女廚師唔好？男友說。
 

其實我好奸，我特登一早講晒d缺點你知，局你包容我。Brenda說。
 

咁好過你而加扮晒野，第時結咗婚先現形變哥師奶吖，巧京京o架大佬！男友笑說。
 

哈哈哈。。。Brenda和男友雙視而笑。

曾聽過不少男友人大讚台妹大陸妹不但入得廚房出得廳堂，連說話都溫柔過港女十倍，屈晒機，但你又有無聽她們結婚後卻會180度大轉變，對老爺奶奶呼呼喝喝，終日在家做大食懶，不煮飯不做家務，假日只懂捉老公去買名牌？

這些世紀大騙案其實每日都發生，至少我聽過不少。（戴頭盔先，感情騙子包括任何男人女人，無分國藉，以上只是舉例。）

其實小盛女非常鼓勵姊妹們學識煮飯做家務，我不是想說甚麼傳統女人當然要識煮飯兼相夫教子這些老土話，只是學識煮飯，起碼第時自己有啖好食先啦係咪？

學識做家務，起碼第時自己一個住都識打理好間姑婆屋先啦係咪？只要懂得錫自己，無論有伴侶或單身都可以過得好好。

你的個性如何，你吸引的男人也必如何。如Brenda一樣性格簡單、直腸直肚，認為做自己最快樂的女人，自然會吸引一些喜歡坦白和不造作的男人。

所以小盛女在此強烈呼籲大家不要再故意去做別人喜歡的自己了，不要再當騙子，那就不用每天害怕被拆穿，而是做真正的自己，去吸引那些真正喜歡你的人。坦白的港女，你愛嗎？我愛。