《暗色天堂》張學友林嘉欣 尋找迷失的安全感【有片】

娛樂 18:47 2016/03/07

分享:

張學友與林嘉欣繼 14 年前的《男人四十》後,在《暗色天堂》再合作。訪問時,二人很合拍甚至互相開玩笑,以為他們私底下也常見面,學友卻說:「幾乎多年沒見面,大約是 5 年前才見過一次,但心中累積的感情,不會因為少見便感陌生。其實也是因我找她演 MV,嘉欣提起有這個 project,於是我便參演了這電影。」

他們片中分演的杜牧師及助理 Michelle 互相欣賞,可是兩情相悅的一吻後,女方竟提出控告,男方由此身敗名裂。

也許相愛很難,就難在其實雙方各有各寄望,怎麼辦?《暗色天堂》是個探索人性與信念的故事。

杜牧師與 Michelle 在車廂內兩情相悅熱吻,可是翌日女方竟告男方性騷擾,究竟當中有何原因?。

張:張學友  林:林嘉欣 記:記者

警剔自己

記:學友飾演的杜牧師因為事業成功及享有社會地位,不知不覺產生虛榮、驕傲的心魔。兩位在事業上都很成功,不免受到吹捧奉承,有沒有曾因此迷失?如有,怎樣警剔自己?

張:實會有過(虛榮、驕傲),幾乎是必然,尤其做我們這行,所以常對自己說「唔止得你識唱歌,個個都有把聲,究竟點解要係你唱?」如果唔努力,隨時有第二個可以取代你。

我們這行很易冇安全感,因為我們的成功是建基於大眾是否喜歡你,我們冇辦法自己掌握,只可盡量去做,講句唔好聽,係盡量做到自己讓人鍾意。可以做的就是盡量比別人早一步找到本身不足,先自行將問題解決,讓人少個藉口唔鍾意你。我的警剔,可說是來自不安全感。

事業本如日中天的杜牧師,被 Michelle 控告性騷擾而身敗名裂。

林:好彩一入行,就已經衰咗(因與經理人有合約糾紛而工作大減),但覺得是好事,由此了解不是所有事都理所當然屬於自己,知道在這行除了很努力外,還要很清醒。

所以第一部戲拿獎(憑《男人四十》在香港電影金像獎及台灣金馬獎均奪最佳女配角和最佳新演員獎)後,向公司提出想去讀書學戲,公司覺得點解咁傻,但我覺得正因為攞獎才更要去學,你有少少 talent(潛質),但終歸會耗盡,不再進修去豐富自己是很危險,有這 awareness(意識)很重要。

擇善固執

記:片中男女主角一直深信的某信念或人,在一夜之間破滅。你們曾否遇上這種衝擊?如果有,心理又如何過渡?

張:曾經有,我一直相信朋友應該兩脇插刀義無反顧,但原來並非如此。一直只是單純覺得朋友應該係如何做,沒有諗對方對朋友睇法可能與自己不同、當時他的經濟狀況等。

現在回看覺得,咩都有可能,唔使太執著。要求,不是給別人,唯一可以要求的,係對自己,那麼便要求自己開心些、要求自己對事件轉個睇法,就較能夠釋懷。

林:我也是一樣,改變不到別人,不如由自己開始。一念之差而已,這可以令自己沒那麼痛苦。

杜牧師另一身份是非牟利機構的CEO,有自己事業上的清晰目標。

記:杜牧師的工作要求很嚴格,逼得工作夥伴叫苦抱怨。可是一件事要做出佳績,卻不免需要有高要求,那麼你們如何在達到工作目標與保持同事友好的關係取得平衡?

張:平時對他們好一些。(大笑)做嘢冇辦法,比如籌備演唱會,大家開會提意見,我明白同事梗覺得好才提出,唔會專登講出來畀你鬧,但如果他的提議很差,我惟有講「下一個」,當佢冇講過,可是必須這樣做,尤其演唱會,係我企上去,如果條蹺差,真係無辦法。

但是,當見到同事係做得好,要畀對方知道你欣賞他,立即採用他的提議,相信這樣,同事的心理是可以平衡到。

記:嘉欣應該會較心軟吧?

林:唔會。拍上一部戲時,我在現場對某一個工作人員說「你不但冇天份,都唔緊要,但你唔努力」,因為他在現場只顧傾偈,像是來玩多過做嘢,我唔容許。(問:對方有否被你罵哭了?)冇,佢唔覺得自己有問題。

張:咁就大件事。

Michelle 一直尊敬杜牧師,被對方非禮後情緒崩潰。

林:我出聲講,其實係出於關心、想對方進步。睇唔過眼就講,以前唔會,但我喜歡演戲,可能現在做了媽咪,寧願割捨陪伴女兒的時間也去拍戲,所以希望整個 team 也投入。是否很 mean?

張:我就唔敢。(笑)換轉是嘉欣剛才所講的情況,俾我不會出聲。但直接發生在自己身上,比如要我演某一樣嘢,我唔相信又唔覺得好笑,對不起,我會話唔得喎。可能我較「獨善其身」,她就完美主義一些。

林:我唔係。

張:你唔係完美主義?我係,否則我點會同你拍。

化粧:Julie Hui(張學友)、Will Wong(林嘉欣)
髮型:Herman Law @ ii(張學友)、Hin Wan @ Wil Colpo(林嘉欣)
服飾:I.T.(林嘉欣)
場地:馬可孛羅香港酒店

【故事大綱】                                                            

杜牧師(張學友飾)一直深受信徒歡迎,連助理Michelle(林嘉欣飾)也被他魅力所吸引。兩人互生情愫,某晚在車廂悅熱吻後,翌日 Michelle 竟到警署告杜牧師性騷擾,令男方身敗名裂。五年後兩人合重遇,在互相零碎的記憶下「重審」案情。(上映日期:3 月 24 日)

撰文 : 鄧龍傑 TOPick記者