新居屋暗藏估價不足風險？

新一期居屋攪咗珠啦喎，中籤嘅幸運兒，過兩個月就可以揀樓，除咗上次綠悠雅苑7個貨尾單位，其餘3,000幾伙，最快2018年先入到伙。最近有報道話，樓價續跌、加上定價不變，呢批居屋樓花有估價不足嘅隱憂。

點解咁講，現時白表買家因有房委會擔保，可向銀行盡借九成按揭。假設層樓折實後賣300萬，買家可借270萬，畀30萬首期；若樓價兩年後跌10％，屆時買家先向銀行申請按揭，以當時市值計算，層樓嘅估值跌至270萬，買家只能借243萬，但售價維持300萬不變，即係要畀57萬首期，變相入場門檻高咗。

好多人都期望，房委會因應樓市下滑對新居屋減價。但房委會再次重申，無論樓價升跌，都只會調整居屋折扣，唔會改變售價。有記者追問房委會資助房屋小組委員會主席黃遠輝，咁係咪意味買家有可能要抬錢上會？

黃生點答？佢話銀行借錢畀居屋買家風險極低，理據係居屋售價低於市場價，並因市況跌而斷供嘅情況罕見，又有房委會擔保，相信估價不足嘅機會不大喎。到底係咪如此？真係要買嗰刻先知。

全文刊於《晴報》，標題經TOPick 編輯修改，原題為「買新居屋都會估唔足價？」

《晴報》facebook