揀老公點解唔揀屋邨仔?

精明消費 12:45 2016/10/26

分享:

早前見到有Blogger指屋邨仔先嫁得過,港女真是笑而不語。香港幾時淪落到安於公屋就成人生贏家?港女對此真的不敢苟同,要住,當然要住私樓。如果屋邨仔是潛力股,私樓仔絕對是優質股。

【延伸閱讀】公屋 VS 私樓 港女擇偶方程式

1. 私樓環境好得多

私樓點解完勝公屋?自然好在居住環境。一分錢一分貨,雖然管理費比公屋貴,但贏在保安較嚴密,閒雜人等較難入內,品流沒公屋複雜。

2. 肯捱肯搏真男人

人望高處發奮上游乃人之常情。揀男人最緊要有膊頭有腰骨,有志氣成為業主,莫非揀老公要揾個怕辛苦、只求安安穩穩過生活的男人? 雖然供樓辛苦,但供完層樓始終是自己,大吉利市講句,有任何現金周轉問題,都可以將層樓加按。

港女深明香港樓價高企,年輕人想租住公屋亦是無可厚非。不過,做生做死做樓奴,只為改善將來居住質素,有一個明確的發奮目標。港女相信投資先苦後甜,有風險才有回報,趁年輕有本錢肯搏肯捱,有志氣的男人先「煞食」。

港女覺得,如果住公屋只為財政自由、有餘錢去歐洲Shopping,得罪講句,同濫用公屋無分別。

【延伸閱讀】樓奴有雞髀食?「屋邨仔」才是人生贏家!

3. 磚頭保值

當然,買樓不光為志氣,「藏富於樓」往往是投資保值的不二法門,升值潛力大。樓值升,自然成為贏家。

本屆傑青黃仰芳早前表示於2003年樓市大跌價時入市,當年230萬左右購入的單位,現時升值至900萬,溢價600萬,試問打工仔要用幾多年時間打工才可賺到?

有人會話,層樓自住升值有鬼用,但向銀行加按套現絕對有用。試問住公屋一世又點可能儲到600萬?

買樓講求的,不只是經濟能力,更是投資眼光及策略,投資態度保守,特別難上樓。港女身邊有朋友不斷「揼心口」,後悔03年跌市時不趁低吸納,反而一直觀望,錯過入市時機。與其在抱怨上不到車,不如及早作好投資準備,做好功課,入市時機一到,即可出手。

更長遠來說,有物業在手,可能你會恥笑港女離地,但有層樓日後可減輕子女兒孫的供養負擔及個人財政壓力,留低的是一份心意,而不是遺憾。

不過一眾港女謹記,戀愛、結婚並不是一場利益交易,真心最重要。莫道你在選擇人,人亦能選擇你,若果手執一份「擇偶方程式」去衡量對方「係咪嫁得過」,而自己只想坐享其成不想付出,先考慮下自己的條件吧,畢竟條件優良的男人,同樣有條件揀個條件比你好的伴侶。

原文刊於「我係真港女」Facebook,TOPick獲授權轉載。

【其他熱話】公屋富戶是終極人生大贏家!

【其他熱話】比劏房更貴的「太空艙」 床位3.5呎闊月租5100

【其他熱話】老細要你走的真正原因:睇你唔順眼!