四孩之父梁家騮:不會買定樓留給子女

親子 17:58 2016/11/24

分享:

六十後的梁家騮雖然遲婚,但4年抱4,擁有2子2女,一家六口非常幸福。左起為大仔、細仔、三女與二女。(相片來源:iMoney)

近年本港每年平均有6萬名嬰兒出世,大部分港父母都是生一個起、兩個止,但據2015年統計,全年就有逾5,000名嬰兒屬第三胎及第四胎或以上,可見港人其實都幾肯生。

不過生得多始終要計計數。10年前,「風之后」李麗珊一句:「養一個小孩要400萬」的廣告出街後,家長們至今仍議論究竟要幾多錢先可養大一個細路。理財專家指,10年後的今天,育兒開支應不止這數目,但父母們也不必為張羅育兒費而慌亂,只要提高理財意識,有穩健投資便可。

剛卸任立法會議員的醫學界梁家騮,與專跑醫療專題的新聞之花結情緣,二人2011年拉埋天窗,翌年大仔出世。自言沒有特別生育計劃的梁家騮,4年抱4,現時大仔讀K2,二女讀K1,三女讀學前班,細仔8個月大。

六十年代出世的梁家騮,對「四個斷擔挑」口號一定不會陌生。今時今日,要養一個孩子,不是老一輩所講天生天養,就算是中產,要養4個細路,既要衣食住行,又要供書教學,梁家騮自有一套理財哲學。

 

今年3月再任爸爸,梁家騮在產房見證細仔出世,當然影相留念。(相片來源:iMoney)

香港好多人都生小朋友,又唔見得個個都要使幾百萬,睇點用法㗎啫,有好多使費平又得貴又得,香港中產也未必要幫小朋友交好貴的學費,其實有好多大眾化選擇。

梁家騮沒有如一些中產家長般,把3個仔女送進國際學校,反而選擇本地幼稚園,這跟他自己在本地普通學校成長有關,認為有競爭先有進步。

我未必平養(子女),但覺得平貴唔係最重要因素,唔係話俾好多錢,第日小朋友發展就好好,有好多好一般成長過程也發展得好好。

梁家騮自己就是「人辦」,自幼家貧,但讀書好,皇仁仔出身,大學時代在中大讀醫,現是專長肝膽胰及腸胃科的外科專科。他又不諱言,沒有預留一大筆錢送幾個仔女到外國升學。

我成日心諗,似乎競爭力最強嗰啲會留番喺香港,競爭力最強嗰啲唔使用好多錢。我自己咁多兄弟全部大學前都在香港讀,去外國都只係進修時先去。如小朋友想去留學,會睇吓佢哋點解要去外國讀。

沒有安排仔女入讀每年學費「十幾萬聲」的國際學校,也沒有儲備到外國留學費用,但梁太透露,3個小朋友的教育開支也不少,單是每月學費加補習或興趣班,就要4.5萬元,連同奶粉尿片加3名外傭照顧小朋友,佔丈夫總收入15%。正如梁家騮所言,未必平養幾名子女,他每年都會帶小朋友短途外遊兩次,而早前為細仔搞百日宴,也花費近10萬元。

投資損手寧願勤力搵錢

開支大,梁太建議「慳啲使」,丈夫反而覺得開源更重要。梁家騮說

之前幾年時間做立法會(議員),現多些時間做回臨床工作,做醫生其實係,勤勤力力唔係收好貴,都會搵錢多過做議員!

未計其他津貼,立法會議員每月薪酬超過9萬元,任期完結後還有筆60多萬元任滿酬金,但他爽快說:「轉頭就使晒啦!呢啲係一筆過之嘛,不是定期收入。」

幾年前,梁家騮與兄長在中環太子大廈夾份開診所,年多前又與幾位股東合資共800萬元,在同區歐陸貿易中心開設內視鏡中心,幫病人照內窺鏡。梁家騮口中的開源,就是要多做醫務工作,增加收入。收入還收入,始終要投資錢生錢。但梁家騮坦言,現時沒有作任何新投資,只靠以前買落的大籃籌股票收息,不想冒險,皆因他蝕過錢。鮮有談及投資的梁家騮,透露慘痛的炒外滙經歷。

蝕得甘㗎!先賺100萬,後尾蝕番200萬……曾幾何時,日圓可以140兌70,當時樣樣都有買吓,發現件事係唔係嗰行好難同佢玩!

幸好,梁家騮是個理智不好賭的人,回望過去還能自嘲:「買啲傳統穩陣啲,但問題係……最傳統個隻滙豐(00005)都唔掂,呢個世界係,你唔係嗰行,諗住用啲好簡單的方法係唔得嘅,最穩陣嘅都會蝕。」雖然數學叻,但他也要多年後悟出這條數,諗起都不禁哈哈大笑。

計番條數真係賺到,就係我每個月出嘅糧,自己做醫生的薪金實賺無蝕,齋儲未嘗唔係一個穩妥的方法,最穩陣就係本行專業的收入係可靠過投資。

不過,他說如果手頭有鬆動錢,就不要輸給通賬,要看看如何維持其資產價值。

密密生更合符經濟效益

近期樓價又再次瘋狂起來,會否買定樓留給子女?梁家騮斬釘截鐵說不會。

物業嘅嘢好長遠,時勢會變,外國好多地方啲人不一定要有物業。20年之後都唔知咩環境,使乜咁緊張,可能已不是那回事,有人覺得物業係穩陣,但我覺得如有一技傍身,唔一定要物業!

梁家騮以前擁有沙田第一城物業,因樓齡舊不想拿大筆錢裝修,兼且又沒有人打理,婚後見賺少少便賣出套現,現居的港島區單位也只是租住。

無人保障樓市一定升,神仙咩?樓市已去到咁頂仲入市?隨時蝕本,現時好多人有錢喺袋度都唔入市住,我寧將現有資源都投資自己的專業發展。

梁家騮自言年紀大生小孩也有好處,就是多些時間陪伴他們。(相片來源:iMoney)

年近半百才結婚生仔,梁家騮反而覺得是最好的時機,更教路生得密着數些。「除非你諗住生一個,如果諗住多過一個兩個三個,無謂隔咁耐。對父母來說,去到(小朋友)4、5歲先生第二個,到時又嚟過?唔隔咁遠,照顧好啲,用嘢又慳好多!」

「我們得一架學行車、BB床最多時有兩張,後送咗一張畀人,也有親人送衫俾小朋友,我們又會把好少穿的細路衫送俾人。」說到此,梁家騮拿出手機,與記者分享幾個小朋友購物樂的片段。

前兩日同佢哋去佐敦,哥哥呢件有斗篷的Superman衫先幾十蚊,妹妹呢件白雪公主衫99蚊之嘛,啲錢咪幾好使囉,呢啲都係慳錢的方法。

這就是他的養兒理財哲學,又明言年紀大生小朋友有優勢,相對多時間陪伴子女,「我都搏殺緊,但如三十幾歲搏殺緊又有小朋友,應該辛苦過我囉!」至於會否再追第五個?梁家騮說暫時沒有計劃,但梁太笑言年紀大要封肚了。

(節錄)

全文刊於《iMoney智富雜誌》第473期(收費閲讀) ,標題經TOPick修改,原題為「梁家騮4年抱4 孩子最緊要一技傍身」

iMoney智富雜誌facebook

【其他熱話】羽絨標籤解密 Uniqlo VS mont-bell 羽絨邊件最暖?

【其他熱話】港媽移居沖繩工作:日本沒有香港那麼大壓力

【其他熱話】李嘉欣「絕不做虎媽」 她是如何培養兒子?

【其他熱話】港版「德蘭修女」:港父母追求贏在起跑綫很瘋狂

撰文 : iMoney智富雜誌