80後巴士美女車神出發 開心分享蝦碌事【有片】

城巴有靚女巴士車長新登場，近日引起不少巴士迷熱烈討論，女主角亦正式曝光。80後女車長阿穎才開工第6天，已引全城熱話，今日（5日）更有不少巴士迷蜂擁追至巴士站等她開工，甚至facebook直播。阿穎原本從事飲食業，轉行當上女車長，因為真的很喜歡揸巴士，也因此開展了事業新一頁。

TOPick記者今日到小西灣巴士總站查詢傳聞中的靚女車長，一班男司機聽聞已很雀躍，「佢好後生咋，個樣完全唔似，返工一星期咋！」

有城巴司機亦慕名而來，聽聞有靚女同事，「我放咗工架啦，特登留低見下佢！」

據知靚女車長名為阿穎，今日返夜更，駕駛小西灣至中環路線，下午3時許開第一班車，已有不少巴士迷到場，圍拍靚女車長。

阿穎向TOPick記者透露，今日才返工第6天，之前從事飲食業，因考車牌已滿3年，符合車長入職條件，所以想轉換新環境。

阿穎說自己喜歡揸巴士，父母也很支持；而之前做飲食業月入只有約1.5萬至1.6萬元，雖然未出糧，但相信車長工資較好；相比之前工作常要站立，車長工作亦可平衡一點。

80後阿穎拒透露真實年齡，但笑言知道近日被拍「醜態」，有點不開心，因為燈光太暗，影得她好像一把年紀。她說：

其實我未結婚，不過無所謂啦。不是18、22，但已經拍緊拖。

阿穎化妝開工，雙手塗了藍色指甲油，與藍色車長制服「襯到絶」。她坦言自己是貪靚的女仔，對於巴士迷蜂擁拍照，阿穎會望鏡頭報以甜美笑容。她說試過有人疑想偷拍，卻忘了關閃光燈，其實她並不介意，大家開心就好：

但最重要影得我靚啲，下次最好去光一點的地方拍照，效果較好。

【延伸閱讀】網傳巴士最靚女車長初登場 月入1.9萬唔易做

女車長不易做，阿穎沒有駕巴士的經驗，但公司會有專人培訓：

教車師傅教得好好，教捽呔，會用女仔的方式教我，不用死扭、爛扭。

雖然身型矯小，但阿穎說揸巴士比私家車反而容易，「睇位」較清楚。不過上新工數天，也有不少蝦碌事。

阿穎說，試過有乘客按鐘，但她忘了開門：

太專注上客唔記得落客，啲客都會話『靚女你未開門』，我就話唔好意思我新來。

她又說，晚上自己一個返廠，確有點驚，她試過有一次巡車，聽到樓上有老鼠聲，那一刻很驚，「叫了一位『師兄』(男同事)陪她到上層，才發現原來是Roadshow(巴士電視)的聲音。」

阿穎坦言，新手始終未熟，有時可能會趕不及返車到總站，同事都會叫她稍為休息，亦明白會需要上洗手間，所以也不是太辛苦。

她說暫時最愛駕駛789往返小西灣和中環的路線：

較容易，好似遊車河咁，但就比較趕。

乘客袁先生指，上車時留意到司機長頭髮，細細粒，大讚手車幾穩。記者觀察阿穎十分細心，有乘客八達通沒有足夠餘額，會說「坐低先 ，啲錢慢慢入」；見到小朋友上車，又會展露笑容與小朋友打招呼。

對於網上熱烈討論靚女車長，TOPick日前已向新巴城巴查詢，對方以私隱為由拒透露女車長資料及駕駛路線，只表示集團現有3700多名全職車長，其中女車長佔大約2%(約74人)。

發言人又指，不論男性或女性，申請加入車長職位，集團對他們的入職要求、提供的訓練﹑工作要求及薪酬福利完全一樣。

【其他熱話】DSE中文科作文題曝光 揀邊條最易中伏？

【其他熱話】80後移居大阪創業實錄：工作辛苦但我快樂

【其他熱話】租樓悲歌 4呎床位扮workspace月租$4700【有片】