你有幾耐無回家吃飯?

休閒 18:15 2015/09/16

分享:

相片來源:影片截圖

以前嫻姐做女的時候,最怕就是要晚晚返屋企食飯,食來食去都是菜肉魚三餸一湯,你唔煩我都厭。

直到依家有咗皇帝仔,為人媽媽,先感覺到一家人齊齊整整食餐飯是何等重要。昨晚嫻姐玩fb的時候,見到雞粉品牌又有新宣傳,搵來一對母子同欣宜做主角,本來以為是洗腦廣告,但原來是以「回家食飯」做主題的溫情故事,催淚指數超高,嫻姐睇完都忍唔住流咗滴眼淚...

【欣宜憶母痛哭… 還有不回家的理由嗎?】影片:

片段入面個四眼仔,一個禮拜得3日左右會返屋企食飯,有時返到去又捉阿媽落街食飯,無視阿媽本來辛辛苦苦預備好的飯餸。偏偏個廿四孝阿媽又鍚到個仔燶,搬幾斤重的鹽返屋企,就是為了整鹽焗雞畀四眼仔食。

最催淚的位依家先上場,欣宜突然爆一句:「我都好想食媽咪煮嘅飯...」廚藝了得的肥姐,生前愛整欣宜最鍾意食的煎蝦碌,肥姐離開之後,欣宜都沒機會再食一餐「媽媽味道」的煮家飯。

相片來源:影片截圖

廣告品牌於是玩驚喜,為欣宜送上煎蝦碌,仲有欣宜婆婆最擅長煮的雪菜黃魚大湯,食到欣宜又笑又喊,嫻姐都睇到好感動。

睇完段片,嫻姐都想起以前少女時有千千萬萬個拒絕回家食飯的理由,希望日後皇帝仔別用這些理由拒絕同嫻姐食飯:

1. 無限OT

出身後,為工作日拼夜拼,遇着上司一句「做埋份報告先收工」,可以準時回家食飯的機會是微乎其微。

有些要跑數的Sales、保險從業員,肯肯定每晚都要跟客人食飯,過着無限OT的生活。

2. 夜更貓頭鷹

從事輪班工作的話,莫講話回家食飯,可能晚上見一面都難上加難,返夜更的打工仔,註定要做貓頭鷹,晚上才是打拼的黃金時間,放工回到家,媽媽都早已入了夢鄉搵周公,又怎樣一家人食餐飯?

3. 應酬朋友、喜愛夜蒲

仔女長大後,自然有了豬朋狗友、紅顏知己,星期一至日都有飯局,應酬無極限,一個不覺意變成喜愛夜蒲一族的話,要坐埋一齊食餐飯應該更難,難道做媽媽的想跟個仔食餐飯,要提早1個月預約嗎?

4. 「無飯」家庭

有時嫻姐在想,他日皇帝仔習慣外出食飯吸味精,嫻姐都沒辦法,跟老公2人份量特別難煮,可能嫻姐都有退出廚房、收山罷煮的一日,從此成為真真正正的「無飯」家庭。

其實嫻姐呢類師奶仔好易滿足,只要皇帝仔一日願意食「媽媽味道」的煮家飯,嫻姐老到99歲都願意煮落去。

相片來源:影片截圖

各位,你們有多久沒回家食飯了?

都市嫻情

嫻姐,80後職場師奶,兼職返工,正職做「阿四」,陪皇帝仔吃喝玩樂,最叻計婆仔數,平日嗜好就是捐窿捐罅搵著數,有着數記得預埋我!

撰文 : 都市嫻情