張晨：靠細蓉打救的日子

香港地，十個學生九個窮，所以我都窮。但同時香港又有度好，就係橫街窄巷之中，總有一兩間隱世平到嘔食店。

當其時，拯救我成個學生生涯嘅就係5蚊炒麵、同10蚊細蓉。嗰時唔知雲吞麵有咩特別，總之雲吞夠鮮，麵底正常，就可以醫肚。

對一個窮學生嚟講，平靚正嘅細蓉係成長一部份。
有時食到厭，加啲紅醋、辣椒油又係唔同食法。你口中嘅飽魚，山珍海味份子料理，可能好華麗，但未必人人食過。

而細蓉相反，佢可能係每個香港人都曾經一嚐嘅食物，人人食過，就叫感情。

感情嘅傳承係好有價值。

呢種情懷亦解釋咗《食神》之中，點解叉燒飯會贏「超級無敵海景佛跳牆」。

不過啲有錢佬好鍾意用錢界定一切，可能佢哋由細離地，平民嘅感情對佢只係一種「冇謂過程」。

但食物除咗珍貴與否，亦都講感情。

《十年》呢套電影，唔係山珍海味，但就係贏在對香港嘅感情。

不過算啦，當佢係一個政協、大老闆嘅時候，佢同我哋，中間根本冇咩共同感情。

原文刊於張晨（鳥不起）facebook，獲作者授權轉載。