百萬Blogger:做經紀至愛的客仔

City 12:29 2016/01/08

分享:

上次講完買樓點樣揀經紀,今次就要學吓點做經紀心目中的好客仔!其實道理很簡單,又是同理心,如果你是經紀,你最想服務甚麼客戶呢?

好明顯一定不會是上車自住客,因為這種客買完之後都不知幾時才有機會再買,當年我都做過這種客,買完之後想再去做定功課都無人啋我!

那麼誰是經紀心目中最好的客呢?

當然是貨如輪轉的投資客!用家買完市場上就少一個盤、少一個機會,但如果投資者買了,最起碼市場上最少都還有一個租盤,所以有好嘢正常都會益投資者。

上期文章刊出後,在臉書有經紀留言,話炒家多的是,所以我們要想想怎可以在經紀心目中排有優先一點的位置。

互相幫忙建立關係

在我心目中,沒有叻的投資者,只有叻的經紀,因為無論你幾有眼光,幾識睇貨都好,都要有經紀肯俾貨你先得。

所以有時自知資歷未夠老前輩深、關係不夠老前輩好,我都會接下摸貨,因為有些貨我真的搵唔到,而當我知道有其他炒家入咗,個價好靚或件貨好罕有,我都會去接佢摸貨,當然最好是去找幫老前輩入貨的經紀啦,因為通常都會易傾一點。

最記得有一次,我發現有炒家買入一個我好想入的單位,找了幾個經紀同佢傾,點知反而嚇親佢以為我收到消息會有收購,點都唔肯賣,後來無意中撞到幫佢入貨那位經紀,先可以順利購入。

與經紀建立關係不單止在入貨時,其實出貨都是好機會。

有時遇上幫得手的經紀,賣平一點給經紀走貨都無所謂,因為下次佢一定會雙倍奉還,所以出貨之時亦是為入下一件貨而鋪路,當然亦要識揀人去鋪啦!

用家找筍盤非易事

其實是好經紀還是好客戶,大家傾一兩次已心中有數,專業的經紀應該知我講甚麼,應該都不會再話還價咁多唔怕被人鬧咩?其實會唔會被鬧,就要看經紀有幾專業啦!

上次專欄一出街,即刻有經紀找我,問認為他是文中哪一種經紀,我話當然是「經紀丁」啦,唔係我哋會咁合拍嗎?佢回應:「又係喎!我通常傾完價先搵你。」

所以有時知道經紀已經做足功夫,差少少價都照入,因為今次賺少了的,下一次佢一定可以幫你賺凸!

說回重點,如果你想買樓上車自住,不要期望會有筍盤,因為筍盤根本不輪到你,要清楚自己的位置,別以為你是客就大晒,與經紀一定要互相尊重,因為山水真可能有相逢㗎!不過上述所講基本上全屬廢話了,因為住宅現時根本無得炒,炒工商舖?我仲未夠班,哈哈!

全文刊於《iMoney智富雜誌》第428期(收費閲讀)

iMoney智富雜誌facebook

撰文 : iMoney 智富雜誌 百萬Blogger財叔