充滿童年回憶味道的零食【上集】

休閒 15:28 2016/06/13

分享:

相片來源:立雜良品Facebook

人久唔久就鍾意懷緬吓舊時,我哋呢班港女今次就同大家重溫吓童年回憶!話說呢堆零食晒冷擺喺枱頭時,都真係幾令人懷念,背景音樂隨即響起:「我的青春小鳥一去不回來……」(嘩打冷震)其實仲有好多零食都想講㗎,你哋都可以留言講吓你兒時嘅至愛!

1. 旺旺燒米餅

鹹魚:「媽~好辣啊~」由一個廣告成為街知巷聞嘅潮語,我哋嘅童年回憶又點少得旺旺呢?

你可以話係「回憶」,亦可以話係「陰影」。還記得細個返學要好早起身,為咗令自己醒啲諗住開個電視,點知嗰個時段不停連續重播7個旺旺廣告(有無人好似我咁「形」住佢嘅廣告時間長過平時好多?),仲勁過永恆嘅亞視,話係「旺旺廣告雜誌」都絕對無誇張,立即俾佢煩到醒晒。雖然燒米餅凹凸不平食落係有啲嚡,但的確係好香口好惹味~

Fun fact:非官方統計,每5個香港人有3個你同佢講「媽~好辣啊~」,佢會識得應你(媽媽tone)「怕辣就食原味唔辣啦~」。

相片來源:立雜良品Facebook

2. 時興隆芝士、咖哩、辣味卷

域拖:時興隆與你~共享昨天今天明天~想當年,我死慳死抵就係為咗買呢幾款脆條,難得嘅係佢竟然咁多年(唔超過十年)都冇加價!淨係呢樣嘢已經要俾十萬個like佢!今次搵齊芝士、咖哩同我至愛嘅辣味,簡直比出奇蛋更能夠滿足我三個願望!

味道方面,當然你唔可以期望佢嘅咖哩同芝士味超級濃,佢嘅辣甚至連小學時候嘅我都食到,但係幾蚊雞買個童年回憶,咩都抵番啦!仲要一包有三條喎!記住食嗰陣要成條對落口,尤以食到成嘴唇都係味粉為最佳!

相片來源:立雜良品Facebook

3. Fonzies芝士粟米圈

人妻:只可以用4個字(母)嚟形容,除咗「L.I.K.E」,就係「欲.罷.不.能」!粟米圈本身已經好好味,仲要配上濃濃芝士味粉,呢個火花同美味指數一定要俾5粒星!而且咁大包,經過年月洗禮依然十蚊有找,抵食!如果一生食零食quota只有100次,相信我已經將一半獻咗俾佢!

……話說細個時同阿哥一齊搶.住.食,芝士粟米圈數量有限,但大家貪念無限,通常會先「隊」好多塞滿個口,然後再套落十隻手指,務求霸佔愈多愈好,就係咁,好快就食完一包!後期大家一人買一包食,唔駛搶,會用筷子逐粒夾嚟食,戒指外型好易夾,又毋須整污手指,你估咁聰明嘅食法係邊個諗到?……能夠帶有難忘回憶嘅美食,真係Ichiban!

相片來源:立雜良品Facebook

4. 黃心梅糖

耳仔: 呢隻細個成日食既黃心梅糖,其實一直唔知佢叫咩名,直至去到鋪頭問老闆:「有冇中間有粒梅嗰隻糖」先知。一嬲都中意食零食,咩零食都食,對佢特別有印象,可能因為細個婆婆成日買比我食。

外面甜,中間酸,通常未啜完出面層糖就忍唔住咬碎佢,直接食完粒梅、吐埋核,先慢慢享受甜味,是為先酸後甜。味道同回憶中一樣,令我回味返小時候跟婆婆同住嘅美好時光。

相片來源:立雜良品Facebook

5. 不二家牛奶妹孖寶朱古力棒

蓮妹:對於細個每日得5毫紙零用錢嘅我嚟講,呢隻朱古力已經係奢侈品嚟㗎喇,所以每次食都會慢慢嘆,等佢襟食啲。雖然牛奶妹同牛奶仔好可愛,但見到佢哋喺我口中漸漸融化、面容變得扭曲,心入面會有種莫名嘅快感(!)好在大個咗心理都尚算健康啫。

事隔咁多年再買嚟食,熟悉嘅味道返返嚟,突然覺得時光可變,世界可變,童年嘅味道真係找不到缺點。唔知幾時先搵到一個人同我一人一支呢可?

相片來源:立雜良品Facebook

6. 蕃茄味薯條、蕃茄味薯片

些王:自細就好鍾意食真蕃茄同蕃茄味嘅嘢(飲嘅蕃茄汁除外),所以蕃茄味嘅零食係我嘅至愛。第一次食呢兩款蕃茄味嘅薯條同薯片時真係驚為天人,頭頂有光咁款,次次都食唔停!

不過細個零用錢唔多,就算$2.5一包蕃茄味薯片都唔係好捨得買(小學雞時已經係窮鬼),而另一款薯條就唔係咁多地方有得買,所以每次食到呢兩款零食時都特別珍惜。到大咗食過其他蕃茄味嘅薯片,始終唔係嗰回事,有啲味道係無嘢可以取代嘅,食一世都唔會厭,呢啲咪就係叫真愛囉。

相片來源:立雜良品Facebook

原文刊於立雜良品Facebook,獲作者授權轉載。

標題經TOPick修改,原題為「兒童節巨獻:童年回憶的味道」。