莊偉忠心臟病發後剖白:四個感恩一個遺憾

健康 10:54 2016/09/23

分享:

8月14日,無任何先兆,心臟病發,從鬼門關前走返上陽間,至愛親朋都話:

大步檻過,吉人天相。

一點三,如常約咗老媽子飲茶,前往中途,氣促心翳汗如雨下,去到酒樓,毫無改善迹象,手腳冰冷麻痹,老婆心知不妙,堅持去醫院檢查。如果唔係大人當機立斷,我瓜咗啦,感恩一。

兩點正,醫院無急症室,登記門診期間,心口好似畀大石砸,口齒唔清,麻痹惡化,心電圖證實心肌梗塞,點知當日無心臟科醫生,須轉介公立。模糊間送上白車,忽接來電,原來大人緊張關頭,搵舊同學醫生幫忙,堅持原醫院做手術,已經聯絡咗兩位專科醫生,𠵱家飛車嚟緊。如果轉院重新檢查,星期日未必有醫生掛單,過咗黃金六小時,就算唔瓜,心臟細胞肯定瓜咗大把,救番都嘥藥費,感恩二。

三點七,入手術室,六點九,完成。醫生話三條心臟血管,一條塞咗百分百,一條97%,一條98%,危險到極,通完波仔,放咗六個支架,送去ICU觀察,咁都唔死得,𠵱家行得走得精神過乜,感恩三。

七點九,接駁心電機驗血打點滴聞氧氣,安排妥當,大仔見我軟攤在床,餓到失魂落魄,二話不說,拎起匙羹,攞起兜粉,第一次餵老竇,佢一啖我一啖,未食過咁正嘅肉絲通粉,兩個仔全日陪伴在側,心好甜,感恩四。

做人好化學,生死控制唔到,專欄都講過:

我怕瓜,瓜咗,見唔到老婆。

估唔到差啲應驗咗。自問光明磊落,對人都算幾好,就係對自己唔好,唔識愛惜身體,唔鍾意瞓覺,我知錯啦。多謝同學、兩位醫生、十幾位手術室ICU護士,無你哋,我見唔到聽日。

唯一遺憾,手術完咗,問姑娘:「我老婆呢?」「做咩?」「想錫佢一啖,令佢擔心,講聲對唔住。」「遲啲先啦。」

【其他熱話】麵包卡路里有幾高?菠蘿包VS雞尾包

【其他熱話】4,700元買消防小型搶救車?運輸署:未必能發牌

【其他熱話】新盤迷你單位大格鬥 邊個最吸引?

全文刊於《晴報》

《晴報》facebook

撰文 : 莊偉忠 康宏金融CEO