杜汶澤曾遇機位超賣:付了錢不代表100%上到機

休閒 15:53 2017/04/11

分享:

美國聯合航空聯合航空周日(4月9日)因機位超賣,竟要求執法人員介入,並將乘強行拖出客艙,結果成功「呃嬲」,全球網民對聯合航空幾乎一致「負皮」,引發「關公」災難。

此事,引起杜汶澤今天(4月11日)以其一貫幽默風格,在個人facebook專頁寫他曾航空公司有超賣機位,幾乎不能上機的經歷。內容如下:

「你唔係唔知,航空公司有超賣機位夏(吓)話?」

今日見到UA單新聞,真係好心噏。

其實大家又知唔知,你比咗錢訂咗機位,都唔代表你100%上到機。

我同助手尾寶,就試過咁嘅經歴。

話說有一次去某個國家拍戲,果度出曬名無啖好食,所以一般人如果唔係為咗錢,絕對唔會去。

Any皮,果朝早我地去到機場check in,個地勤人員(利申唔是UA)話:杜先生,唔好意思,班機爆咗。

我:哦...... 咁好生意?咁恭喜你喎。

地:...... 你無位喎。

我:吓?哦。尾寶!

咁尾寶咪比張 e ticket 比佢囉⋯⋯

地:係,你係訂咗位,不過我地爆左喇,所以你上唔到機喇!

我同尾寶異口同聲大叫:係咪真咖(架)?

一諗到唔使再去某國,兩個即時跳起yeah啦!之後我就同個地勤講:

咁麻煩你同個製片講有件咁嘅事,今日拍唔到嘞,你話你肯賠,咁就ok啦!咁我就返去瞓嘞吓!

寶:好呀!多謝你呀小姐,我其實好眼訓呀!

出咗名成日肚餓同眼訓嘅尾寶當然好開心。即刻打比製片,然後將個電話交比地勤人員。我隱若聽到電話裡面傳來鏗鏘響亮嘅粗口聲,從地勤個樣睇嚟,件事其實未完。地勤收綫之後,打咗個電話,跟住又有一兩個人過嚟,又㩒下部電腦。之後佢好似好x驚喜咁吊高把聲話:綺!杜先生!我搵到個位比你呀!

我:「搵到」個位比我?我訂咗咖(架)!

之後我地(哋)拖住兩個hand carry 同兩條半睡嘅身軀上機。

寶:「搵到」個位喎,九成九搵到第二個好蝦d嘅乘客就真啦!

我:咁梗係啦。

其實到今日我都仲係好好奇,究竟咩政權,可以咁樣保障生意佬呢?點解因為飛行成本高,就可以一千個位賣千幾張機票呢?點解比咗錢都唔等於飛到呢?究竟係咩logic乜嘢法律可以咁保障航空公司呢?係咪全世界都咁呢?

當然大富豪會答你,係呀!細佬,所以我自己有飛機囉,你唔鍾意搭的士你都買車啦!

有錢佬,當然會咁答。

但係有時呢個世界上唔公平嘅事,就未必有人答到我。

【其他熱話】80後巴士美女車神出發 開心分享蝦碌事【有片】

【其他熱話】DSE英文閱讀卷開考 「千禧世代」是2000年出世或畢業?

【其他熱話】HSBC高級副總裁的一天 在職媽媽管理時間技巧

撰文 : 鄧龍傑 TOPick記者