消防員唔識綁鞋帶又點喎!

City 17:52 2015/11/20

分享:

相片來源:iStock

嫻姐早上係公司吃緊火腿通,對面位嘅何師奶突然超級勞氣地講,「依家啲人唔知有無搞錯,牛高馬大居然唔識綁鞋帶,點旨意佢哋去救人」,嚇到嫻姐心都離一離。

追問下才知何師奶看緊篇新聞報道,說有受訓的消防員不懂洗熨衣服及綁鞋帶,嫻姐都覺得太離譜,脫口而出:

唔係呱,我屋企個皇帝仔,五歲幾都識啦!

豈料隔離位九十後Intern一句說出個重點來,「唔識綁鞋帶,好正常之嘛!」

經過討論,嫻姐真係相信係呢個畸型的社會,唔識綁鞋帶才是正道!

1.  潮流興懶人鞋

據九十後Intern所言,為了方便懶人及迎合潮流趨勢,無論是「三間牌」還是「一剔牌」,基本上每年都會推出幾款不用綁鞋帶的「懶人鞋」,深受歡迎。

Intern更分享,「一剔牌」更打算迎合科技潮流趨勢,將電影《回到未來》中那雙「自動綁鞋帶」的波鞋變為現實,拯救滿足懶人的終極願望。

Intern的說話不無道理,話說嫻姐前幾年都買過一對懶人鞋,舒服又不失型格。

2. 踎低會被人笑

無論是波鞋還是皮鞋,只要是綁鞋帶款式,鞋帶總有鬆綁的時候。

Intern分析道,大街大巷踎在地上綁鞋帶,特別是穿上筆挺的西服時,真的很失禮。即使是身穿T恤牛仔褲,當你踎低那一瞬間,可能已被冠上「強國人」之名,「真係唔好搞啦!」

3. 毒男無需出街

比宅男更當道的毒男,真係可能連鞋帶係乜都唔知!

嫻姐鄰居懷仔只有十多歲,但日日躲在家中,連學也不上,只顧打機。問毒男鞋是何物?平日足不出戶的毒男連鞋也不用穿,又怎需要綁鞋帶?嫻姐每次看見他,都只是「踢拖」,當然不用綁鞋帶啦!

4. 工人姐姐幫手

活在香港黃金世代的九十後、零零後,不少家中都有工人姐姐吧!

工人姐姐的任務就是照顧好小主的日常生活,每日起床幫忙刷牙洗臉、更換校服、餵食早餐,揹上書包抱住去學校等行為,早已見怪不怪,

Intern揶揄道:

唔識綁鞋帶有乜出奇,我有D同學仔畢業那天,連襯衫D紐扣都結錯啦! 

5. 絕世好媽媽

討論到最後,Intern再說出個重點來,唔識綁鞋帶,全因「好媽媽惹的禍」。

嫻姐同何師奶都覺得呢位Intern所言甚是,時下不少父母溺愛子女,「要阿仔綁鞋帶好辛苦架」、「鞋帶好污糟,又要去洗手」、「阿仔踎低會見頭暈。」總是將最好的給子女,不讓子女輸在起跑綫上,結果只着眼於子女的測驗、考試成績如何,但忽略了子女的自理能力。

想當初,嫻姐為免被冠上「怪獸家長」之名,花了幾個星期教皇帝仔綁鞋帶,還因皇帝仔抗拒而狠狠打了他,現在聽到Intern的分享後覺得,唔識綁鞋帶又點喎。

都市嫻情

嫻姐,80後職場師奶,兼職返工,正職做「阿四」,陪皇帝仔吃喝玩樂,最叻計婆仔數,平日嗜好就是捐窿捐罅搵著數,有着數記得預埋我!

撰文 : 都市嫻情